NAUNGEK A DING NU NAWITUI HOIHNA

Naungek Ading a Manpha Pen Nu' Nawizu

          Kha guk nuaisiah naungekte ading a kisampen in nu' nawizu ahi hi. Nu pawlkhatte in pumpi melsiakha leh ci-in nau nawi pia nuamlo thei uh hi. Nu' nawi a phacia kikhelin tawm a tualzawkna pen nau nawi piak man hilo zaw in naupaai hun sung in hong paikhia  Hormones tuamtuam hang hi zaw hi. Nu' nawizu sungah naungek lungsim pumpi cidamin hong khanhoih nading in a kisam dat tuamtuam (Protein, Calcium, Iron, Zinc, Magnesium, phosphorus etc..) cihte leh Vitamin nam tampi kihel hi.

Nu' nawizu teepna  hangin naungek in a ngah hamphatnate

1. Nu' nawizu in sungpai natna, lungno tuamtuam leh natna tuamtuam pan dal hi.

2. Gilkialna leh dangtakna phasak ahih manin adang tui aa kipan nektheih dawntheih piak ding kisam nawnlo hi.

3. Adang mohvui tuamtuam lei kullo ahih manin sum nemtuamsak hi.

4. Nu' nawizu bek teep ahih manin nek leh dawn khat peuhpeuh tawh kilemlo/kihua (allergy) cih bang omlo pah hi.

5. Gilpi in gawi nopsa-in gilpi cidam hi.

6. Sungkhakna pan dal hi.

7. Nau nawi piakna hangin Nu leh Nau kizopna khangsak in ki-itna liansak hi.

8. Adang nek le dawnte bangin bawl leh pawi kisamlo ahih manin siangtho hi. (Nau nawi piakma-in Nu' nawi tui siangtho tawh sil masa in. Satpiang (ဆပ်ပြာ) zang kei in. Satpiang siang kei leh Naungek sungpai thei hi.

9. Nu' pumpi pan ahih manin votlua (ahkl) lumlua cih omlo-in a lumna hoihbek den hi.

10. Nawizu tam pia luakha-in val cih omlo hi. (Naungek a kap sim, Nawi a zon simin Nawi pia in.)

11. Nu' nawizu in maitang satak, khaguh leh hatangte zong cidamsak hi.

Nau nawi piak hangin Nu in a ngah hamphatnate

1. A kisap hunhun in kipia ziauziau thei hi.

2. Siangtho den hi.

3. Nasep tawmtuamsak hi.

4. Sum nemsak hi.

5. Naubu cidamsak in nausuah khit siluang natna (postnatal haemorrhage) pan dal hi.

6. Nau khamsak hi.

7. Nawi Cancer pan dal hi.

8. Lungsim cidamsak hi.

Ref;Second year Maternal Health Nursing Text Book,Mega Lifesciences Ltd.(Child Care Section)-Volume 1

Source: Haulun

NAUNGEK A DING NU NAWITUI HOIHNA

Nu nawitui pen hoih mahmah, manpha mahmah, thupi mahmah ahihmanin nunkhum/nawizu kici hi. Nawizu pen thupi mahmah ahihmanin Pasian in Canaan gam hoihna Israel te kiangah Bawngnawi leh khuaizu a luanna gam ci in gen hi.

Numei pen nawi tawh kilawm mahmah a, Solomon in numei te nawi hoih a sak na leh etlawm a sakna te gen hi.

Na nawite pen a takhawm helhel sakhi peeng,

a omkhawm hialhial sanang nih tawh kibang hi.

Tuum kung bangin na etlawm a, na nawite pen,

nisuh gah a bawk pha mahmah tawh a kibang hi.

Tuum kung tungah kahto-in a gah ka lo ding hi. Na nawite kei adingin leenggah bawk tawh kibang a,na gimnam epel min bangin namtui hi. Solomon late 7:3,7-8

Nu in nau a pai tung pek a kipanin naungek tawh na khempeuh ah kizom a, a nu nuntakna sungah nungta hi. Nu sung pan suak khia in lai a tan khit a kipanin a nu tawh kizopna pan kikhen khia a, tua a kipan an tak a nek ma dong Nu nawitui tawh kivak hi.

Nu nawizu sungah cidamna ding leh tha hatna ding a kisam khempeuh Pasian in kicing takin koih hi. Nau in nawitui a kham mahmah leh bukvei, Awmna, cisa leh sungpai cih te ngah hak zaw pah a, mawk kahneh gawp lo pah hi.

Naungek a ni ni in khanglian semsem a, nawitui tam ne zo semsem a kha guk a cin ma, an dang bangmah pia vetlo in nawitui bek mah ne leh hoih pen hi. Kha 6 a cin ma pen Nu nawi gau lihliah in a tui tak hat hat zo liang leh hoih pen a, a tawm pen kha 6 sung a nu in nasep san lo in naukem henla, naunawi pia pahpah leh hoih pen hi. Tua hun laitakin Nu a diñgin nawitui hau a, nau nawi piakpiak ding sangin a thupi zaw dang om lo hi. Nu in a ta ngek a nawitui a piak sangin a hoihzaw dang omlo hi. Mipil misiam te thugen tampi te a nihna hipan a, tua zong nu in nawitui neilo maw nu nawitui ngah theilo maw te a ding hipan hi.

Naungek kha 6 a cin khit ciangin an nem lam (supplementary food) a hi; Singtaimai gah, tomato, mai gah, nahtang leh buhcim te pia ta ding a, nau nawi piak khiam tuanlo dinghi. Nek theih khat peuhpeuh na piak na kuang, sikkeu, nawithawl cih te tuiso ah diah in silsiang pahpah in.

Nu nawitui pen ganhing te nawitui leh Company te bawlte tawh genteh theih ding hilo a, a hoih mahmah dingin Pasian bawl ngiat ahihi. Banghanghiam cih leh Nu nawitui sungah Water, Protein, Fat, Lactose, Mineral-te leh Vitamin cih te om kim hi.

1) Water (tui) : Nu nawitui sungah naungek kisap mahmah tui om a, tua tui pen ih cell te a khan na ding ahihi. Naungek in nawitui a kham kei leh tui kisam (dehydrated) thei hi.

2) Protein : Nu nawitui sung a Protein om pen Bawngnawi sung a Protein om sangin hoih zaw a, gil sungin zong zo zaw hi. Nu nawitui sung a om protein pen naungek cidam takin a khan theihna ding hi a, natna a ngah ding te pan a dal pipen ahihi.

3) Fat (thau) : Nu nawitui sung a thau (fat) pen Bawngnawi sung thau om sangin hoih zaw a, Nu nawitui lum hithit in naungek in a dawn/ a tep pen hoih mahmah hi.

4) Lactose Milk (Nawizu khumna) : Nu nawizu a om a khum (lactose) pen Bawngnawi leh a kibawl tawm te sung a sangin hoihzaw hi. Nawitui sung a Lactose pen naungek gil sung a tun ciangin Lactic acid in pawlkhat piang a, tua pen naungek gilsung a om ante a gawizan sak (digest) na ah kizang hi.

5) Mineral : Nu nawitui sungah Calcium, Iron leh tha hatna a piangsak na te zong om a, hih te pen naungek an dang (supplementary food) kisam nawnlo diñgin Pasian bawl ahihi. Nu nawitui sungah naungek a diñgin a kisam Vitamin te a kicing takin Pasian in koih hi.

Mangngilh vetlo diñgin nau na suah khit phet in nawitui a om masa pen (colostrums) na ta pia hamtang in.Colostrums pen ankam pakmel Yellow colour tawh a kibang, aktui cik tawh kibang hi.

Nawi bek a ne laite pen naungek ahih manin a man le a man lo thu bangmah phawk thei nai lo uh hi. Hebrew 5:13

Note in antak nezo nai lo na hih manun nawitui ka hong tulh hi. Tu mahmahin zong nawi bek mah tulh ding a kisam lai na hi uh hi. 1 Korin 3:2

Nupi khat in a ta nawi pia-in limtakin a kep bangin,

minamte le kumpite in nang hong vakin hong kem ding uh hi. Isaiah 60:16

Video : Ellie Vung Sawm Cing

Source: NK Nang