ANEULAI PAN IN PANTAH SIAM IN PART X

TATE KEPNA LEH PATTAHNA (Part-10)

Naupang te siatna kipatna sex leh khamtheih ahihi. 

Psychologist Signmnd-Freud in mihing lungsim 80% pen zahmawh (sex) ngaihsutna (sex education) in ukcip hi, ci hi.  

Mihing te kum 4 ih phak a kipanin numei zun thakna leh pasal zunthakna a kibat loh lam kithei ta in banghangin kibang lo hiam, numei ten bang nei a, pasal ten bang nei hiam, nu te in nawi lianpi nei a pa te nawi lian lo hiam cih te theih kipanin thudot kipan hi. 

Tua banah numei puan leh pasal puan, khedap a kipan vanzat khempeuh, mai, muk, sam a kipan kizemna na khempeuh a kibatloh lam zong tel ta uhhi. Thu a theih uh ciangin nu kei koi pan piang, koi pan suak cih te zong dong thei uh a, naupang in zahmawh tawh kisai thu a theihnop te nulepa a dot ciangin maizum huai naupang nono ci in bangmah hilh lo in kitai bawl suk gawp hi. 

Naupang te in zahmawh tawh kisai dotna neukha nei in a gen pian nak uh leh maizum huai ka zakna ah kam khat gen lai vevua, ciangduai na thuaknop kei uh leh kici vava zaw in bangmah kihilh ngei vetlo hi. A zawdeuh in numei pen kum 12 a phak a kipan khasim si neih kipan uh a, kum cinglo ih cih cih hangin sex zang leh nau a pai thei cihna hi ta hi. Numeino in kha sim nin a neih ciangin a maizum mahmah a, natna lauhuai a nei kisa hi, ahih kei leh naupai ta ing cih nangawn kitheilo hi. Naupang a lian a khang mahmah te kum 12 panin nu cia phial mah pha in pasal (sex)zong uk thei in naupangno ih cih cih hangin sex ukna in nakpi in na zo khin thei hi. 

Tate in bangci bangin nau kipai thei hiam cih naupang te in a dot ciang leh dong kei leh zong numei leh pasal sex zat khop pen a gen ngam vetlo limlim nulepa om hi. Naupang te in nulepa kiang pan a theih zawh loh uh hangin amau leh amau a ki maingap te kikhoih sak uh in sex zat kisin uh a, maizum loh kisin uh in tangguak a om te kisin uhhi. A zawdeuh in numeino si nei khin te a naupang om om uh hangin pasal khat in zol leh buan tak cing sa ta ahihmanin kum cingnailo in pasal tawh sex zang baih lua ahihmanin zongsang in sex lo in om theilo thei hi. Tua ahihmanin numeino te pen nute in zahmawh tawh kisai theih huai thu hilh vet ding hoih zaw hi. 

Na khat peuhpeuh a hih sin nop hun

Numeino leh pasalno ih cih kum 10 a phak uh kipanin a zia leh a hek khat uh kikhel a, kep leh pattah bek hilo in nakpi takin hilh leh sinsak ding kisam uh a, tua te lakah zahmawh thu pen a thei ding hita uh hi. Ahihangin tua gual a hih hun laitak un phat leng zadah uh, hoih tak ciai ci ding ut tuanlo uh, mi gilo ci kha leng lah hua mahmah uh a, a zia khat uh telhak mahmah uh in om pulpul uhhi. Amah bek a om nuamsa in a sungtawng ah lunggulhna banghiam khat simneih in mi theih ding lah ut lo uh a, kikhelna banghiam khat a om hi. Thu khat peuhpeuh ci tentan uh a, heh baih leh phun hat kipanin na duh leh duh loh neih kipan uh a, heh na ding zong zong thei uhhi. Naupang lungsim pua nawnlo ding tawh kibang uh a, naupang bangin bawl leng lah hithei lo in picing lah hinai tuanlo uh a, laklawh mahmah uhhi. 

Kuama theihloh kal in lawmngaih nei in gen ngamna neilo in mi sim ngaih mahmah hi. Lungdamna leh nopsakna lunggulh kipan a, sum deihna leh van thak deihna zong nei ta uhhi. 

Lungsim ngaihsutna nei ta uh a, lungkhamna leh lunggimna, khasiatna leh lungkim lohna te zong nakpi takin thuak ding kipan uhhi. Maizumna thei in, utlohna leh lawpna te zong nei hi. Na khempeuh a kisin diñgin kipan ta hi. 

Limlang mai ah a hun tampi zang in ki en en in ki zutzut nuam a, a sam, a mit, a biang, a muk, a bil kipan a melhoihna tawh kisai nakpi takin buaipih ding kipan hi. A lawm a gual te a phakloh khak ding lunghimawh in a lawmte neih a neih zawhloh ding lunghimawh mahmah hi. 

Khua sung, sanginn sung, Biakinn sung leh mun khat peuhpeuh ah a pai ciangin a kizang thei diñgin mi nungzui leh mi sawl tangzang diñgin kizang pan ta a, na hih khial thei in tai leh maizum zoñg thuak zel hi. A sim a gamtat leh lawmte tawh kithuah khop te hih zel zel uh a, a ki upmawh pih loh loh te tawh kithei in kingaihpih zong nei thei ta uhhi. Lawmte tawh gualnop leh noptat lamah ki thanop suah in khamtheih leh sex te zong ciamnuam uh hi. Na khempeuh a hihsin nop hun laitak ahihi. Hih hun sungin nungak leh tangval kisin ta uh ahihmanin thuhilhna hoih mahmah a ngah lo te siatna sungah tawmvei sungin thuklut suak pah hi. 

Khatvei vei nulepa in a zaknop vetlo thu pawlkhat za zel ding uh a, nakpi takin ih dot hangin ahih na himah leh naupangte pen sahang, humpi leh kek tawh kiciam ngam ding uhhi. Thuhilh leng hong nial lo in hong mang lo ding uhhi. Mi'n gensia leh zong a khatvei na ah maizum ding uh a, aban pen ki ngeina seh ding uhhi. Sangkah lai a hih leh a lai hong lel mahmah dinghi. 

 Nulepa tungah thu a gen nop melloh hun

Nungakno te leh tangvalno te a genhak thumang lo a nei kha nulepa te nakpi takin lungkham kipan uh a, ta te tai tai in thuhilh hilh ahihmanin tate in nulepa muhdah leh maingaploh kipan uhhi. Hih hun ciangin nulepa te pen Pasian thu ah tate ngaihsutna in piangthak kisin loh phamawh hi. Zawlthu leh ciamnuih uk mi ahih leh kikem zaw deuh ding, phekap leh game lam a ukmi ahih leh hih nawnlo ding, zu leh zatui zang mi hih leh zang nawnlo ding, Laisiangtho sim leh thunget te kisin loh phamawh in thu tawh nuntak hun hita hi. 

Tate pen nulepa tawh kikim ding hita hi. Thuhilh lecin hong dawng ngam ta dinghi. Tai lecin hong cikik ngam ta dinghi. Sat in beng le cin a hai vanglak leh hong thuk ngam ta dinghi. Nuakcip ngam in na kisawl zo nawnlo thei hi. Na khat hong nget pen na piak loh phamawh dongin hong ngen ngam dinghi. Na ngek bawl luat leh a lawmngaihnu/ a lawmngaihpa tawh na khen leh ka sih ding ut nei vua hong ci giap lel dinghi. Tua ahihmanin hih hun a tun ma in na tate hoih takin kem inla, pattah in. Hih hun ciangin zong na tate lau nai kei inla, thuhilh inla, thunget nget sak in. 

Na tate a hoihloh ding lau lua liang leuleu in phone lei sak nuamlo, top up thun sak nuamlo, a lawmte tawh kikholh ding phal lo, amau bek kikhawm sak nuamlo cih bangin house arrest in kemcip vet kei in, independent lungsim a neihna diñgin suakta sak zel in. Nikten puansilh, khedap leh vanzat ah a khan gual eng leh pha zolo diñgin bawl kei in. 

Na sum in a lei zawh leh a hoih pen, a kilawm pih pen, leh a siangtho thei pen ama deih pen te mah lei sak in.  Sangkah a hih leh a sang sum a pia nunung pen in om sak kei in, homework bawl manlo liangin inn sung nasem sak kei in, misi inn leh hun bawlna khempeuh ah ton pih pih kei in. Na tate muang inla, innah amah bek a hizong om sak lel in. 

Na tate in haksatna tampi a neihna

Nulepa te ukcip luat leh thuhilh zawh luatna hangin lawmlehgual tawh kikhawl ngei vetlo cih zong hoihlo leuleu hi. Na tate khan gual te worship makai in kizang thei ta in nang tate kizang theilo, vai khat peuhpeuh makai te in nang tate na sawl thei vetlo ahih leh nulepa te in na tate haksatna kan inla, huh in. A paina ding sum, kipawlna ah piak ding sum leh sep ding a om leh na tate na ngaihsutna in hun leh sum zong zang ngam in. Na tate a siat khak ding na lau luat manin na khempeuh ah na khak tan den leh a hoihna ding zong khak tan sak thei hi teh cih phawk in. 

Na tate in sam a bawl sak ciang leh kizemna tuamtuam a hih ciangin tulai hun suakthak (modern popular) hong zang ding uh a, a khengval (over) luat leh nu in tate kuppih in genpih hamtang ding hoih hi. 

Tua ahihmanin nungakno leh tangvalno a hih hun laitak in na hoih leh a hoihlo tel nai taktak lo uh ahihmanin Pasian kiangah nakpi takin thu ih nget sak tangtang ding ahihi. 

Naupangte in Khamtheih guihtheih kihih sakna in nei

Naupangno te in a gim nam a kitam zak lo te leh a hih sung a sawtlo theithei te kan uh a, bang a ci peuhmah hiam mi hi zah in a zat ci in sin nuam limlim uhhi. Na tate za/cigarette lei diñgin sawl kei in, khaini/sahdah lei diñgin sawl kei in, beer/whisky/rum te a lei diñgin sawl kei in. 

Zakang leh zavom te a muhna ah tep kei in, kisun kei in. Ahihangin na hih loh hangin na tate in mundang te na kisin thei hi, cih thei in. Tua ahihmanin na tate khut te vel zel in, a ip sung leh a thungpi leh a vankoihna te en (check) zel in. Na tate in khamtheih zang hi hong kicih leh zang mahmah ken teh cih het kei in, na tate a zang a hih leh ka nu/pa in zong hong phal ci pah dinghi. A kikholh pih te in zatep hi zudawn hi, zatui kisun hi cih na theih leh na tate dong pah inla, khamtheih a zat vetlohna ding gen pah inla, na zat teitei uh leh hong dawm lo dinghing ci in warning pia pah in. 

Khamtheih tawh kisai in na tate kiangah sumbawlna ding a hoihna, cidamna diñgin a hoihna leh khan gual tawh kikholh theihna hi ci in a hoih lamin kamkhat zong na tate zak in gen kei in, nulepa in zong khamtheih tawh sumbawl loh ding hi pah hi. Na tate in khamtheih kem in mat sak le cin zong kei ah hikei, ka lawmte ah ka kep sak hi hong ci dinghi, a nek/dawn/tep/a kisut laitak tuak ta le cin zong a lawmte mah khiat ve ve ding a, na tate in khem cihtakin hong khem dinghi. Na nulepa zong khamtheih zang mi ahih leh tate hong khemkhem dinghi. Khamtheih guihtheih zah in online zong zangkhial in a siat pih tam mahmah hi. 

Tate kepna leh pattahna cih tawh kisai in a suak naungek pan kum 15 kikal te a diñgin thu tampi genkak tuanlo in tua teng tawh a hial bawl ta hi sak phot ni. Thu khat ih gelh ciangin hiang tampi nei in ka ziazua thei a, tutung a pen behlap nuamtuam diñgin a hoih a om khak leh  cih kicing hetlo in kong gelh ahihi. 

Pasian a kikhemzo dingin ngaihsunkha kei un. Mi khempeuh in ama vawh nam khaici mah ngahkik ding hi.Tua ahih manin na hoih sep ding cimtak kei ni. Lungkia loin i sep nakleh a hun ciangin thaman i ngah ding hi. Galati 6:7,9

@ NK Nang