Dr. Viktor E. Frankl Tangthu

Adoft Hitler in a bawlsiat Jew mi Dr. Viktor E. Frankl Tangthu

Dr. Victor Emil Frankl pen 26 March 1905 in Austria-Hungary Empire khuapi Vienna ah suak hi. Viktor pen Jew minam hi a, a pa leh a nu te; Gabriel Frankl and Elsa Frankl ahihi. 1941 kumin Tilly Grosser tawh kiteng a, a zi a gailaitak in a nulepa, a sanggampa leh a zi.tawh Adolf Hitler in thah sak hi. Kum thum sung thong a kiat khit ciangin suak ta a, 1947 kumin Eleonore Katharina Schwindt tawh kiteng in tanu khat bek nei a, a min Gabriele Frankl-Vesely phuak hi. Viktor E. Frankl pen kum 92 sung nungta a, 2 September 1997 in Vienna, Austria si hi. 

Judah mi 60 million a that Germany Chancellor Adoft Hitler zong Austria-Hungary gam ah Austria-Hungary in 20 April 1889 in suak a, kum 16 in Viktor E. Frankl sangin upa zaw hi. Hitler pen galkap lut in Germany ukpi suak a, Victor E. Frankl pen sangkah in University of Vienna panin 1925 kumin Doctorate in Medicine zo a, 1948 kumin Doctor of Philosophy zo leuleu a, Doctor thuap nih ngah hi. Gamkhat a piang khawm Adoft Hitler leh Viktor E. Frankl te in galpi khatna leh galpi nihna phukhawm uh a, hih te gel tangthu pen nasia mahmah in zaknop mahmah hi. 

Dr. Viktor E. Frankl pen doctor siam mahmah Neurologist, psychiatrist hi a, cina te a bawl bek hilo in amah leh amah a kithah (suicide) sawm te zong kem a, suicide a ut mi 3000 dam sak hi.  15 July 1927 in Austria khuapi Vienna, palace of Justice mai ah buaina piang a, protester 89 si in 600 liam a, police te zong mi 5 si in, 600 liam uhhi. Dr. Viktor E. Frankl pen damlo leh a liam te bawl in gam leh mipi a dingin nakpi takin zato ah sem hi. Tua hun in Vienna ah mi 2 million val om.a, Jew mi 200000 val om hi. 

Adoft Hitler thu

Adolf Hitler pen 20 April 1889 in Braunau am Inn, Austria-Hungary gam(tu laitak Austria gam sung)ah suak a, a suahna khua pen German Empire tawh gamgi ah om hi. Adoft Hitler pa Alois Hitler in 3 January 1903 in kum 65 pha in si a, a nu Klara Polzl (kum 47) pen 21 December 1907 si a, kum 10 a phak in a innkuan lutang suak a, a unau un tagah mahmah uhhi. 1905 akipan Vienna khuapi ah kituah in 1907-1908 sung the Academy of Fine Arts ah lut a, sang zo nailo pi in khawl kik hi. 5 February 1914 in Austria Army dingin a lut sawm leh physical exam ah kia hi. Tua ciangin Germany gam Munich khua ah pai hi. 

Galpi khat (28 July 1914 to 11 November 1918)a  kipan ciangin German Army te leh Austria-Hungary Army te kipawl uh a, tua ciangin Hitlet pen German gam mi hihna tawh galkap kilut sak kik a, Bavarian Reserve Infantry Regiment ah om in, 1914 kum.October kha in the First Battle of Ypres gal kidona ah kihel pah hi. 

Galpi khatna ah Adoft Hitler

28 June 1914 in Austria kumpipa tapa Archduke Franz Ferdinand leh a,zi Duchess of Hohenburg te Serbia gam Sarajevo ah pai uh a, a pai na vuah tangval khat Gaverilo, kaplum uhhi. July 23, 1914 in Austria in Serbia tawh kizopna khempeuh khaktan in 28 July 1914 in gal kido ding thu tangko a, tua pen leitung galpi kipatna ahihi. Tua hun lai in.Austria leh Germany pen kilawmta mahmah ahihmanin Getmany in zong July 3, 1914 in gal kido ding gen pah a, August 4, 1914 in Belgium sim pah in August 4, 1914 in British in Germany te kido ding genkhia pah hi. German Hungary, Bulgaria leh Turkey te pangkhawmin British, Belgium. Russia. France, Italy, Serbia, America te pamgkhawm uh a, kido uh hi. Kum 4 sung a kido uh leh galkap 8 million val si a, November 11, 1918 in Germany te leh a pawlte ki surrender uhhi. June 28, 1919 in "Versailles treaty" cih kilemna bawl uh a, German Emperor Wilhelm II zong ahihna pan kikhawl sak a, Germany in galkidona kisia te bawlpha khin ding, sum liau ding leh galkap 100,000 val nei theilo dingin thukim uhhi. Galpi khatna ah Germany in a lelh manin cihmawh lawh mahmah hi. 

Adoft Hitler in German ukpi a sepna

Germany President masa pen Friedrich Ebert in galpi khat a bei khit a kipan uk a, 11 February 1919 – 28 February 1925 sung sem hi. Germany President nih na pen Paul von Hindenburg in 12 May 1925 – 2 August 1934 sung sem hi. Germany President thumna pen Adolf Hitler in 2 August 1934 – 30 April 1945 sung sem hi. 

Adoft Hitler in Germany President a sep ma in Führer of the Nazi Party ah  29 July 1921[1] – 30 April 1945 sung sem a, 30 January 1933 – 30 April 1945 in Chancellor of Germany sem hi 2 August 1934 – 30 April 1945 sungteng Führer of Germany zong ahihi. 

Adoft Hitler in Galpi nihna piang sak;

Germany gam thuneihna khempeuh Adoft Hitler in a lak ciangin galkap neih ding thupi sak pen a, 1934 kumin Volunteers.( Para military. SA =  Strum Apteilung) 3,000.000 nei in, 1938 kumin German Army 600,000 nei a, special a kizang Panzar Tanks, 3300 nei hi. 1939 kum tawp kuan lam ciangin German Army 1,500,000 pha ta hi. Galpi khatna a "Versailles treaty" thukimna palsat khin ahihmanin gal kido mah ding in kiging pah a, September 1, 1939 in Poland sim in, Galpi nihna kipan hi. 

 August 23,1939 a kilemna laipi a bawlpih Russia te June 22, 1940 in a sim dingin kuan a, 22 June 1941 – 8 May 1945 (kum 4 sung) kido uha, mi 12 million si a, Jew mi 1 million val si a, 20 million val liam hi.

Judah mite a kipum muhdahna

500-1500 kikal kum 1000 sung Europe gamah Middle Age kici a, Topa Jesu sihna ding a vaihawm Judah mite ki mudahna (antisemitism) nasia mahmah hi. 1517-1648 sung Reformation hun sungin zong nasia mahmah hi. Kum zalom 19 na ciangin Volkisch Movement cih German leh Austria-Hangary te ah om leuleu in Aryan (India, Iran leh Europe mi nampi deuh a ki ngaihsun) te lakah zong Judah mite muhdahna nasia mahmah hi. 

Galpi khatna (1914–1918) hun ciang Judah te muhdahna khang semsem a, German leh a pawlte hatlohna pen Judah te pumkhiat pongmawk uhhi. Judah mite pen galkap leh kumpi thu ah kihel mello uh a, sumbawl leh gankhawi lam leh lokho nasep lam nak hih zaw uhhi. 

Adoft Hitler in 1933 kumin Volkisch Movement" bulphuh in nasep kipan kik a, midang khempeuh in Judah mite mudah takpi in Adoft Hitler zui uh a, “Shoah” (Holocaust zong a kici) a kici Judah mi 6 million val leh midang 5 million  a vekpi in 11 million val thahlupna tung hi. 

Adoft Hitler in Judah mite kipawlna "Nuremberg Laws of 1935" khakcip sak hi. 1933 kum a kipanin Judah mite gawtna mun a cih Concentration Camp bawl uh a, Einsatzgruppen a cih uh Specialized Paramilitary Unit-te in kum khat sung in Judah mi 2 million thatlum man uhhi. 1942 kum akipanin Europe gam sung mun tuamtuam a te kaikhawm in meileng tawh nawn ziahziah uh a, Gas Chamber ah khutlum pahpah uhhi. Galpi nihna ah ah Germany te leh a pawlte in a lelh uh ciang 7 May 1945 in Jew mite kithahna khawl hi. 

Viktor Emil Frankl thu zop kikna

1940 kum in Viktor Emil Frankl in Rothschild Hospital ah nasep kipan hi. Rothschild Hospital  pen founder Baron Anselm von Rothschild in 1873 kum in the hospital of the Israelitische Kultusgemeinde in Vienna, Austria ah a din ahihi. Hih Viktor E. Frankl sepna Hospital pen Adoft Hitler in mithahna zato (Nazi euthanasia program) in 1939-1945 sung zang a, zato ngeina ahihna pen 1943 kumin khakcip sak uhhi. 

Nazi te thupiak bangbang in Viktor E. Frankl in a hihnop loh ciangin in kiman a, Theresienstadt Ghetto (concentration camp) Terezín,  Protectorate of Bohemia and Moravia ah kipuak hi. 

Tua lai ah Judah mipil a om khawmte;

1.  Leo Baeck (leader of Reform Judaism)

2. Ludwig Czech (member of the German Social Democratic Workers' Party in the Czechoslovak Republic )

3. Jakob Edelstein (Czechoslovak  Zionist, social democrat)

4. Viktor Frankl (Austrian  neurologist and  psychiatrist)

5. Kurt Gerron (German Jewish actor and film director)

6. František R. Krau(Czechoslovak Jewish anti-fascist writer, journalist and editor)

7. Egon Lánský(Czech politician for the Czech Social Democratic Party (CSDP), journalist, political commentator, spokesperson and columnist)

8. Arnošt Lustig (Czech Jewish author of novels, short stories, plays, and screenplays)

9. Viktor Ullmann (composer, conductor and pianist)

Theresienstadt ah mi 33000 kithat a, mi 88000 te extermination camps ah kipuak in kithat hi. 

Viktor Emil Frankl kikoihna Theresienstadt Ghetto (concentration camp) ah 1941 kum November kha in Czech Jews te kipuak a, 1942 kum June kha in  German Jew te leh Austrian Jew te kipuak hi. 1943 kum kipat tung lamin Dutch Jew te leh Danish Jew te kipuak hi. 

Viktor Emil Frankl kimat zawh kha nih khit ciang 25 September 1942 in a nu, a pa, a sanggampa leh a zi gailai te Nazi te in man uh a, Czechoslovakia Nazi Theresienstadt (Terezín town) Ghetto ah puak uhhi

Vikor Emil Frankl innkuan pih te 19 October 1944 in a omna uh pan Poland gam a Auschwitz death camp ah kipuak a, 25 October 1944 in tung in kithahlum uhhi. July 1942 in Austria ah Jew mi 181,882 om a, khuahun a hoih khit ciangin Jew mi 2,000 bek omlai a, Adoft Hitler vaihawmna hang in Vienna khuapi ah Jew mi 179,882 si hi. 

Viktor Emil Frankl in concentration camp ah a om sungin a innkuanpih sihna thu te zong za hi. Ama omna pen mipil te omna deuh hi in Nazi te in a hoih koih deuh te hi uh a, ahihangin ganno bawl bangin sat in dawm tuanlo uh a, Nazi te thahlup ma in laulua in a si zong tam mahmah hi. Viktor ahih leh concentration camp ah a kikhum ma pek in a kithahlup sawm (suicide) mi 3000 val a dam sak ahihmanin amah zong tua tawh tha la in a lungsim sia sak vetlo hi. May 7, 1945 in ki surrender uh a, May 8, 1945 in Viktor Emil Frankl in zong genthei takin kum 3 sung a omna panin suakta hi. 

A zi in sihsan, a nulepa ten sihsan, a sanggam pa in sihsan in a dawn ding khat zong om vetlo himah leh a lungtang khauhsak in a pianna a khua Vienna ah ciah vingveng hi. Camp pan a suah tak khit ciangin na hoih tak mah in sem a, amah a hehnem dingin 1947 kumin Eleonore Katharina Schwindt tawh kiteng a, tanu khat nei hi. Doctor of Medicine a ngah khit banah doctor sin thuah a, 1948 in PhD (Doctor of Philosophy) zo hi. Camp pan a suahtak khit ciangin kum 42 nungta lai a, 2 September 1997 in kum 92 pha in si hi. 

Viktor Emil Frankl laibu te;

1.Man's Search for Meaning.(1946)

2. The Doctor and the Soul, (1955)

3. On the Theory and Therapy of Mental Disorders (2004)

4. Psychotherapy and Existentialism(1967)

5. The Will to Meaning.(1988)

6. The Unheard Cry for Meaning. (2011)

7. Viktor Frankl Recollections:(2000)

8. Man's Search for Ultimate Meaning. (1997,2000)

Agelh;@ NK Nang

Lakna;Laibu saal