ANEULAI PAN IN PANTAH SIAM IN PART II

TATE KEPNA LEH PATTAHNA (PART-2)

5. Na tate pil ho inla, a cing in thu genpih in. 

A tanu kum 10 mikhat in ei khua ah tagah bangzah om ci in a nu dong hi. A nu in naupang nono tagah omzah khawng thei nuam, dai lel o, cih san hi. A tanu in nu aw tua ahih leh ei beh sungah tagah bangzah om ci in dong leuleu a, bang thu e na gengen, naupang nono na lawmte tawh va kimawl hithiat, ci in tai gawp hi. Ahihangin a tanu in nu aw tua ahih leh ka lawmte lakah tagah bangzah om a cih ciangin a nu a lunghimawh ta hi. 

Ka tanu in tagah vai hong nakdot mah si e, bang thu thei ahi tam, banghang in hong dong dong ahi tam, theih khat nei hin teh ci in ka tanu hong dotna naupang bangin dawng dawng kha ing ei, aman thu picing takin hong dong dong hi veh e, ka tanu thu theihnop na pan ken zong thu thei ding mu ning ci in ngaihsun hi. 

Banghangin maw ih khua ah tagah bangzah om, ih beh sungah tagah bangzah om, ka lawmte sungah tagah bangzah om na cih pen bang hangin tua hong dong na hiam, tagah cih thu kuan hong gen hiam ci in picing thudot in a tanu dong kik hi.

Tua ciangin a tanu in nu aw thu kongdot ciang nong taigawp pahpahhi ve cin thu ka theih te kong gen nop hang ka thugen te nang za nuam lo na hih ciang a, nu kei zong tagah a kisa hiveng, ka nu taktak hilo maw, ci in mi ka dot sawmsawm laitak hi. Nung lamin tagah naupang te in thu a gen gen uh hangin a nu leh a pa te si khin uh ahih ciang vua a nulepa te in dawng thei nawnlo hi, ci ka za hi. Naupang te thugen bangmah kisim saklo, ki thudon lo, ka lawmte khempeuh leh kei mahmah zong tagah vive maw nu ci in gen hi. 

Tua ciangin a nu kiphawk kik a, nasem a kuan ding ciangin a tate kiangah tuni na vasem ningin inn ah pi tawh pu tawh na om unla, na pi thu na mang un, na pu thu na mang un, na u nau un nek ding te ne khawm ding kitawngtawng lo ding, sunpha ci in hoih takin kam vaikhak hi. Kal khat sung a nu vaikuan ding ciangin a tate in kahkah uh a, tua khit ciangin nu aw nasep nuam inla, moh hong puak in, sunpha ci thei ta uhi. 

Nitak vai a ciah ciangin tate kei hong ciah ta, na pi thu na mang uhhiam, na pu thu na mang uhhiam, na nek ding uh chocolate hong puak ing, ci in a tate in tuivot tawh a nu dawn uh a, a nu in vaitun nuamsa in a tate in a nu ciah ding ngaklah mahmah uhhi. 

Nu in nitak annek khit ciangin a tate kiangah thu hoih leh thutak vive gen pih in hilh in pa tawh pilehpu te tawh innkuan in hun bawl den uhhi. 

Nupi lungham pawlkhat in tate ihmu hit hiat khat phong gawp in sing gawp, lokgawp, benggawp, sat gawp thei hi. Thakhat in tate in tua bang a tuahvat ciangin a lungtang kisai vat in laugawp thei a, meidawi suak thei hi. Papi khat in Lo panin zusa sanno ngek diakduak a nungta lai ciahpih a, ka tate in mu nuam mahmah ding ahih teh ci in pua hi. Inn a tun ciangin a tapa pen luai sungah na ihmu hit hiat hi. A tapa in muh leh lungdam mahmah ding hi veh aw cih a om ding kal ngah lah ahihmanin luai sung a ihmu a tapa phong gawp in a tapa zusa no pia pah pah a, a tapa in tel mel phalo in zusano a muh pen lau gawp in a ci ling a, tua pen a pianpih hihetlo pi a pa pattah hoihlo pen a sih mateng lau in ling suak hi. 

Tate naupang bangmah thei nai kei, na cih ma in na tate in na mit hek thei mahmah hi. Na aw suahthei mahmah hi. Na tate na hai bawl a, thu gina lo teng tawh na makaih leh khua a theih ciangin tagah kisa takpi ding uhhi. Tagah a hi te zong itna tawh kem in thuhoih tawh pattah in pil ho le hang a tagah lam a theilo ding ahihi.  Tua ahihmanin kampau leh thugen te picing takin gen in pahtah in itna tawh na tate kem in. 

Mihoih pa in a lungsim sunga thuhoih omteng hong suahkhia a, migilo pa in a lungsim sunga a gitlohna teng hong suahkhia hi. Bang hang hiam cih leh mite pen amau’ lungsim sunga a om bangbang a hong paukhia uh ahi hi. Luka 6:45

@ NK Nang