ANEULAI PAN IN PANTAH SIAM IN PART IV

TATE KEPNA LEH PATTAHNA (Part-4)

1. Na tate tungah na hihloh phamawh cih zang kei in. 

Naupang te in na khat khit khat siam leh thei in a khantoh na dingin hun tampi kisam hi. Nute leh naukem te in a khan ding kal kingak lah mahmah ahihmanin nau aw hong khang mengmeng aw, huan a um dawng, mai dawng hong bang aw, ci in ih awi hi. Ahihangin a sam zang khat nangawn ih khang sak thei kei hi. Ahihangin naupang pen dam dam in hong khang khang hina pi in nulepa leh a kemte in a pil leh a siam diñgin a hoih leh lungkim huai takin ih pattah thei tuan kei hi. 

Na tate pumpi khan ding na ngak lah luat a pumpi kisap sangin an tam na piak zawk leh a sanna hong khak lo ding a, thau gawp lel dinghi. Tua ahihmanin a khan ding thatang hat thu tawh hanciam kenla, a khan tawh kizui in a pil semsem ding hanciam zaw in. 

Nang aircond nuai ah nai 10 val nasem in khuadam sa in na ciah ciang na tapa zong khuadam sa diñgin ngaihsun in hehpih lua kisa in blanket silhpih lecin ut vetlo ding a, na deihsakna a theilo sa in beng suk in nawi tawh na khim theih leh khualum sa lua in zingsang ciangin cilpual sa in tho dinghi. Tua pen a damlo sa in clinic na paipih leh sum bei sawnsawn dinghi. Hih bang hun ciangin na ta thumang lecin hoih zaw dinghi. 

Nulepa te leh a kemte in ama theih tan leh hoih a sak tan naukem in pattah ahihmanin khuak hoih mahmah in a suak te zong a khuak dual sak a, ciim mahmah in a suak te zong lung am sak hi. Naukem lua liangin a hoih a hih khak ding nangawn phal lo tawh kibangin kikem cip thei hi. Naupang cidam thahat lua pen kep zawhloh manin pua pua in a khe nangawn kawi in a kal kual lawh hi. 

Tate mi thupi a suah ding deih sak lua in Pasian tungah a nasem diñgin ap ziau, doctor diñgin ap ziau, engineering diñgin ap ziau in a ap bangin a neu tung pan a makaih lah hipeuhmah lo hi. Pasian nasem ding ap in a nu leh pa in zu ngawl theilo, za ngawl theilo, thunget zia ding zong pattah tuanlo in Pasian nasem diñgin ap in a min zong Samuel, Peter, John, Andrew cih te behlap zawzen in Samuel, Peter leh John te zune guta in a kitom tom suah hihang. 

Samuel pen a nu in Pasian nasem ding ci ahihmanin nawi a ngawl a kipan Siampipa kiang koih pah hi. Engineering ding ih deih leh sangkah kahsak ding hi mai hi. Na ta in lai zo vetlo pi in science subject na sin sak leh doctor suak tuanlo ding hi. Samson zong a nu in a suah tung a kipan a sammet lo ding a cih pen a lawmngaihnu Delilah in a sam tan sak veve hi. 

2. Naupang a khan tawh kizui in kem inla, pattah in. 

Naupang khang leh Pak Kung khang kibang hi. Pak bel sungah Pak kungno khat suan in, Pak a dep theih ding kiat khempeuh bot siang pah pah in, lungno, miksi leh leikha te in a nek lohna diñgin zatui buak zel in, nisa, guahtui leh huih te in a hih siatlohna diñgin dal in, a kung lian in a om na a hoih zawk ding leh mundang ah tuah in, tua pak kung pen na khut tawh zut zut, tawitawi, pua pua kei in, leihoih za mawk piak kei in, nang hoih sak bangin kem kenla, a pak khan Hun tawh kituak in a kep siam in, tampi a pakleh a lungdam pen ding nangmah na hihi. 

3. Na tate deih thudon in. 

Tate in bang hih, bangsem, bang kisam, bang gen uh, bangci ciang hi ta uh cih thei gige in. Na tate thugen pen naupang kamtam ci kenla, hoih takin thudon in, naupang in a muh bang lian behlap lo in gen uh ahihmanin naupang thu pen siang mahmah hi. A simmawh a om leh gen ding a, a guk leh a neksim nangawn gen dinghi. A gen theih kei uhleh na muh tek tek in hong hih kik lel ding uhhi. Tua hun ciangin a lungsim uh siangtho mahmah lai ahihmanin nang zong naupang neu kha kha cilo in lungsim siangtho takin gen pih in. 

4. A deih tel sak in;

Naupangno khat amah tawh kituak in bawngnawi pia le cin na piak zah ciamteh in thei pah dinghi. Ahihangin a suh sak leh a lak sak a om ciangin nidang teh a kilak sak kik ding sa pah ahihmanin a om zahzah tang khin nuam hi. Ahihangin amah bek a hih leh a duh zah dong le cin kum 3/4 kim te in hong gen pah ding uh a, a duh leh a duhloh te zong hong gen lai ding uhhi. Puan a hizong, khedap ahizong van khat peuhpeuh ama a ding a hih nak leh a deih tel sak in, naupang lungkim leh lungdam muh nuam mahmah hi. Tua bangin naupang a deih na lei sak na pen naupang pattah hizaw lo in na ta tawh na lungsim leh ngaihsut na, kampau leh gamtatna a kizom diñgin a bawlbawl na hizaw hi. 

5. Tate tawh kilai kei in;

Tate pen thuhilh ding, tai ding, kumpi hong phal zah khengval lo in sat ding hi teh. Nupa kitot lungham manin tate thu theilo te pei gawp, not gawp, khin gawp, lumlet gawp, tum gawp, beng gawp, lok gawp, nuai gawp cih te zang kei in, na tate in na thu hong man loh ni in zong khan gual tawh kilai bangin na tate mawk velh gawp kei in. Na tate in hong lau ding hoihlo a, hong zahtak diñgin pattah zaw in. 

Tate in a gol khit ciangin a nulepa simmawh in a lehdo ngeingei leh Absalom tawh kibang ding uhhi. Absalom in a pa do in a kumpi tokhom nangawn tuh hi. A pa in mipil leh galkap hau zaw a, nak zawh ngap lua a, zo takpi dinghi. Ahihangin a tapa sinso na do vetlo in kihem khia in galtai zawsop in a tapa do diñgin gam kuan nuamlo hi. Kumpi gam khat ah gal piang suak ahihmanin galkapte a kuan loh phamawh a, Ka tapa Absalom na dawm mahmah un aw, ci in vaikhak liang hi. Absalom in a pa itna leh hehpihna pen lehdo teitei ahihmanin sihlawh a, a pa in Absalom hangin nakpi takin kap in tamlo liang hi.

 Tua ahihmanin nulepa te in tate ki it mahmah a, mipil leh misiam hi in thupha ngah ngiat diñgin ih deih mahmah hi. Tate bangci kep in bangci pattah thei ding i hihiam ci in a khantohna ding ki lunggulh ciat hi. 

@ NK Nang