ANEULAI PAN IN PANTAH SIAM IN PART VIII

TATE KEPNA LEH PATTAHNA (Part-8)

1. Na tate kiangah phalna ngen kei in. 

Nu leh pa pawlkhat in a tate naupang mahmah lai te nangawn lungkim sak nuam lua in tuni vakna ding nei ing in hong phal in aw, nong phal leh kei vak ding, nong phal kei leh kei vaklo ding ci in ngen thei hi. Tua pen naupang khutnuai ah kipum piakna leh guallelhna khat ahihi. 

Naupang te in na khat peuhpeuh ahih ding ciangin nulepa leh a kemte mit hek en masa lo in, phalna ngen masa lo pi in mawk hih hetlo uhhi. Na tai kei a na kham kei leh a phal cih na hipah hi. Tua ahihmanin tate in nulepa kiang pan phal leh thukimpihna la den uh hi. Zomi te paunak ah "naupang thu leh Hausa thu" cih khat om a, tua pen naupang te tung pan phalna nget ding leh naupangte thu thu in na khempeuh ah gamtat ding kisa kha hi. Naupang te in nulepa thu hong mang mahmah uh a, naupang thumanglo cih pen a kipan tah khial hilel hi. 

Tua bangin ciamnuih leh cihtak in naupang te kiang kam gen ngei kei in. Vakna ding thu phamawh na neih leh zong hoih takin a thu in hilh vet in. Ka vak kal in na nau te na velh leh ken hong ngai nawnlo ding, na pa in zong hong ngailo ding, na nau ten zong hong ngailo ding ci in innkuan sung ki it na a susia thei kamciamna te khat zong zang kei in. Naupang te pen picing te bangin ho lecin hong zongsangin hong zahtak zaw ding uhhi. 

Tute ngek bawl luat na hangin, tate ngek bawl luatna hangin kampau kikhial baih mahmah hi. Ngek bawl luat manin a khasiat huai thei thei leh a nehno theih theihna diñgin pattah le cin kahneh leh nuak hat tawh zomto lai dinghi. 

2. Kheng ngam in, beng ngam in. 

Naupangte a hai gamtat a ngeina hi a,

deihtakin pangbetna in

mihoih suaksak thei hi. Paunak 22:15

Nulepa leh naukem te in naupangte it lua liangin, hehpih lua liangin thumang kei leh zong nidang ciang, a gol deuh ciang hoih lel in teh ci in en hit hiat lel uh a, tai ngamlo, khengngamlo, beng ngamlo uhhi. Naupang te a hai gamtat pen a ngeina hi cih Solomon in gen hi. Siampi Eli in a tate hai gamtatna te kham zolo, hilh zolo ahihmanin a innkuan leh a minam leh a gam in haksatna thuak lawh hi. 

Na tate na tai ngama, Thu na hilh ngam ding ahihi. Tua pen Pasian zia hizaw hi. 

Topa in a it mite thuhilh a,

ta taktakin a ngaihsut mite a taii hi. Paunak 12:6

Tate hilh ngam ding thu te;

1) Nek ding a hoihlo te; an nin, tui nin, moh nin,

2) Tawi diñgin a hoihlo; temta, ciangkang leh sikzum te,

3) A kitam theina te,

4) A bal kek theihna te,

5) A suksiat theihna te

3. Zuih ding thukhun bawl in.

1) Innkuan in Anne ton ding (gtn: zing an nai 10:00, nitak nai 8:00) 

2) Kisil hun (gtn: zingsang nai 8:00, nitak nai 7:00),

3) Kimawl Hun (gtn : nitak nai 5:00-6:00 kikal)

4) Inn sung puah siang hun (gtn : nitak lam nai 6:00-7:00 kikal)

5) Lup Hun leh thawh Hun (gtn : nitak nai 11:00, zingsang nai 7:00)

Hih bangin naupangte zuih ding hun na bawl leh nulepa leh a kemte in zong zuipah lian ding hi. TV/video en laklawh lua, kimawl lak lawh lua, game kimawl lak lawh lua cih nangawn khat zong phal kei in. Sangkah hun, nasep hun leh kikhop hun tawh kituak ding, venglepam, naseppih te leh Pawlpi mite tawh hun kituak sak in. Naupang te gilkial leh tuiduh in koih kei le cin na thu hong mang ding uhhi. 

Tua banah naupang kepzia ding leh pattah zia ding tawh kisai kumpi te thukhun leh Laisiangtho sunga thu tawh kituak in makaih leh pattah ding ahihi.

4. A hih ding te seh sak in. 

Naupang cidam a hih nak leh mawk omcip dikdek hetlo dinghi. Inn nawt, puansawp, kisil, kuangsawp a kipan innsung nasepte sem nuam dinghi.  Football, volley ball, boxing, kungfu akipan kimawl ut dinghi. Drum, guitar, piano, khuangtum a kipan music van (instrument) khat peuhpeuh hih nuam dinghi. Worship la akipan la khat peuhpeuh sa nuam maw, za nuam dinghi. Car, motorcycle, truck, JCB, meileng, vanleng, thaupi a kipan galvan leh setvan lam khoih nuam ding hi. Kizem leh laigelh cih te zong hih nuam zel dinghi. Naupang khat in a muh leh a zak khat peuhpeuh thei nuam in hih sin nuam pah hi. Ahihangin bangmah hih theih leh tangtun khat zong neilo ding a, tua ahihmanin naupang pen kep leh pattah ding kisam mahmah hi. 

Na khat ahih laitakin na mawk laksak a, na mawk suhsak leh heh mahmah dinghi. Tua ahihmanin naupangte in a hihnop leh a ut te pen pum hih sak gawp ding hilo a, hoih takin en in kep ding ahihi. A siatpih leh a liampi theih ding a hih leh a heh leh a kah pen a thupi pen hilo a, a hih nop nawnloh ding a thupi pen ahihi. 

 

@ NK Nang