ANEULAI PAN IN PANTAH SIAM IN PART VII

TATE KEPNA LEH PATTAHNA (Part-7)

1. Naupang te phat inla, tha pia in.

Naupang te in a hoih pih ding thu ahihnak leh phat inla, tha pia in. Ahihangin tua pa/nu nang kihta maw, tum gawp ve, sui gawp ve, lau maw lawmlawm, hih gawp o, na lelh leh ken sat gawp ding ci lecin nang hong muan manin tha ngah mahmah in kihang san sak ding a, gilo suak thei dinghi. Tua ahihmanin naupang pen aktui gu, pencil gu ding, cigarette lei ding, zu lei ding leh mi a ko ko diñgin tha piak hetloh ding ahihi. 

Kam khum pen khuaizu bang hi a, i kamah khum a,

i pumpi adingin zong hoih mahmah hi. Paunak 16:24

Na tate in puan a silh leh kilawm ci in, khedap a bulh leh kilawm lua teh ci in, Sam a bawl/met leh kilawm lua teh ci pahpah in. A kilawm pih dingte mah lei sak takpi pah in. La a sak leh ama kiangah siam lua teh, ci in, Laisiangtho a sim leh hoih mahmah hi, hanciam in ci in. Na tate in na hoih a hih leh tha pia inla, na hoihlo a hih leh thuhilh in. Ahihangin mipi mai ah na tate, na pate, na sanggamte, na innkuanpih te phat phat kei inla, amau tungah na Lungdamna mipi mai pan tam gen lua kei in. Mikhat in a pa bek bek gen gen, a tate phat phat cih na zak kik leh na khasia kha dinghi. 

Na tate na phat leh amah phat kenla, na hoih a hih na te gensak zaw in. Kuang a sil leh na kuang sil te siang mahmah hi. Na inn phiat leh na inn nawt siang mahmah in inn sung nuam pah ei, kilawm pah ei, ci zaw in, amah na phat leh nidang ciang phat ngai suak dinghi. Na nasep zo baih lua teh, hoih lua, siang lua, kilawm lua, ci in a nasep a thupitna leh a manphatna a telna diñgin a genpih pih na hizaw hi. 

2. Naupang te na phat leh Kam kilawm zang in. 

Ka tapa/ka tanu pen a pil pen, a siam pen, a melhoih pen, a hat pen cih kammal te zang kei in, na cih khit phet lungdam mahmah dingi. Naupang in tua thu mangngilh hetlo in a lawmte kiangah gen pah ding a, kei apil pen a cih leh a lawm ten kuan ci, ci pah ding a ka nu in ci leh na nu tawh kibang bek uh teh, a hai pen hong cih na ci thei hi. Tua ciangin a lungsim na mahmah sa in hong ciah ding a, nu aw ka lawmnu in na nu in a pil pen hong cih pen a hai pen hong cih na hong ci in kei a hai pen maw ci in a dot teh a nu in amah ai ve a hai zaw ei, tua bang peuh ci kik leh a tanu leh a lawmnu a sutuah hi ta hi. 

Inn a phiat leh nang kei huh thei ta, na phiat manlang si teh, siang lua ei, nu thumang te a pil ki ci hi, ci lecin a pil cih ut ding ahih ciang nasep thanuam pah dinghi. 

Naupangte limlang leh video pen a kep leh a pattah naupang te ahihi, cih phawk in. Mipi lak, Biakinn sung leh omkhopna khat peuhpeuh naupang te omdan khempeuh pen a inn sung omdan teng leh a pantahte ah tengmah in kampau in a gamta uh ahihi. Na tate in nasep khat peuhpeuh khatvei na hih sak khit nak leh nu aw ken hong hih zaw ning, ken hih thei ing, ken zong sem nuam ing, ci in a tha a nuam mahmah na dingin phat siam inla, thapiak zong siam in. 

Tua ciangin, “Kua sawl ding a, eite adingin kua va pai ding ahi hiam?” Topa’ cihna aw ka za hi. Tua ciangin ke’n, “Hih lai-ah kei om ing! Kei hong sawl in,” ka ci hi. Isaiah 6:8

@ NK Nang