KRISTIAN TE PUL NATNA ATHUAK DAN UH

NI DANGLAI A KRISTIANTE IH PUL NATNA A THUAK DAN UH

“Mihingte nuntakna pen gal kido-na mun ahih manin na telsiam kei leh na thungetdan ding zong na thei kei ding hi.” John Piper

Nidanglai a,Rome kumpi gama pulnatna thu en kik leng.kum zalom 1-na panin kum zalom 4-na sungin Rome kumpi gamah nih vei nasiatakin pulnatna om hi.A khatvei na pen AD 165 kumin hi a,a nih veina pen AD 251 kum ahi hi.A khat veina pen Rome kumpi Marcus Aurelius-ih a thu neih laitak ahi hi.Tua pulnatna pen(smallpox) ahi hi.Rome mipi khen thum suah khen khat in sihpih uh hi.A nih veina pen a masa sangin nasia zaw lai hi.Mi siamte in tua natna pen Ebola ahih kei leh SARS dan in gen uh hi.Plague of Cyprian ci uh a,ni khat in mihing 5000 bang si uh hi.

KRISTIAN TE GAMTAT DAN

Rome hunlai in kristian te pen tawmno khatbek pha uh hi.Milim biakna gam ahi uh hi.Pul natna a nasiat laitakin Rome mipite lungkham in buai mahmah uh a,nisim in mihingte nuntakna beibei uh ahih manin kuamah a kidon man ding omlo uh ahih manin misi luangte pen khua pua lamah a lom in,koih khawm lel uh hi.Dam lote in,a kem ding nei loin lau in lipkhap zaw uh hi.Misite pen a vuiding omlo ahih manin khua pua lamah kilom koih hi.

Sociologist Roney Stark in,a lai gelhna ‘The Rise of Christianity’ cih laibu sungah hih hunsiat laitak leh a lau huai mahmah hunsungah kristiante in,a nuntak uh kipia in,hanciamna takin a mihing pihte kiangah a itna uh lakkhia uh hi,ci in gelh hi.Tua hunlai a,kristian te gamtat hoihna te phat in tangko khia hi.

Khatna ah;

        Kristiante pen ki niamkhiat takin natna ngah a,a lungkham mite leh a siding mite kiangah pai in,khamuan nading thapiakna nei uh hi. Tua bangin itna leh lainatna a lahkhiatna uh panin Pasian a upna uh pen a nuntakna uh tawh lakkhia uh ahih manin Pasian a umlo mite in, Kristiante pen midangte a it leh a nungta upna a nei in,mu thei ta uh hi.Tua in Kristian ki behlapin milim bia te leh Greek mipil tampite in,Pasian theih lawh uh a,lam etna thak neihna in zang uh hi.

A nihna ah;

       Kristian te in,UPNA simloh ki ngak nading bangmah neilo uh hi.Haksatna a tun ciangin kristian te in,biakna dangte sangin mai nawt nading lampi thei zaw hamtang uh hi.Tua banga a pahtak huai leh a deih huai nuntakna in,Rom kumpi gamsungah Kristian mimal pungsak semsem hi.

A thumna ah;

       AD 251 kumin pulnatna a nih veina a tun ciangin a masa zaw sangin nasia zaw in siatna zong tampi piang zaw hi.Carthage gam (North Africa) bishop Cyprian in hih dan in gen hi.“Kristian upna leh nuntakna pen,thu-um lo mite in,a mit uh tawh a muh theih nadingun a gamtatna uh tawh lakkhia in,a mau nuntakna bei ngam in,midangte nuntakna it sak uh ahih manun (martyrdom)Kristian nuntakna ah sihna lau loh,nuntakna ka mu thei uh hi,a ci hi.

US President Trump in ‘Faith Initiative’ program a mat ni a,a gen pen “Upna in kumpite sangin nasem thei zaw ahih manin Pasian sanga nasem thei zaw,a vanglian zaw bangmah omlo hi a ci hi. (Faith is more powerful than government, nothing is powerful than God” a ci hi.Upna thupisak mahmah hi.Pasian a ngamtat kei leh science siamna pen bangmah in ki zang thei lo hi. 

BANG CIH GAMTAT DING IH HIAM

Thu ngetna;

       Thu ngetna pen Pasian tawh kiho na hi a,thugen mawkmawkna hi loin kha tawh kipawlna ahi hi.Tua ahih manin hun haksa ta mah leh Pasian thu-um mite in,khawl lo a,i neih hamtang ding pen thu ngetna ahi hi.

Genkhiatna;

        Lungkham a,lam et beite kiangah Pasian hong hehpihna leh a khamuanna thu genkhiat ding kisam hi.Lai tawh gelh a,hawm khiatna zong thupi hi.Tu laitak Covid-19 natna sungah pumpi damna bek pen mihingte kisap hilo a,kha dam nading zong a kisam ahi hi.

Pumkhat i hihna lakkhia in;

       Huih lakpan hong pai,a lau huai natna tuamtuam te pen kipawl khopna tawh do-a zawh theih ahi hi.Kristian te pen minam kibang loin omna gam kibang kei mah ta leh Pasian sungah pumkhat i hih manin tua in hong tha hatsakin mailam nuntak nadingah lam etna thak hong pia hi.Tua ahih manin lung kituak a,pan khopna in gualzawhna ahi hi.

Note tungah hong kibawl ding nadeih uh bangin midangte tungah nabawl un.Luka 6:31

Hih pen kristian nuntakna thulai-gil khat hi a,zong thupi mahmah hi.Tua bang nuntakna in,Pasian thu-umlo mite makaih in,Rome gam khuapi zong kum zalom 4-na hunlai panin emperor Constantine nuaiah kristian gam a suak hi.

By RDL

Zomi history group