46NA US PRESIDENT JOE BIDEN TANGTHU TOM

JOE BIDEN TANGTHU TOM

JOE BIDEN America gam President lakah Catholic biakna pan a nihna dingin ki lalut ta hi.

JOE BIDEN-PEN

Joe Robinette Biden Jr. in attorney (ukil) nasem khin a,Politics-na a sepkhit a sawt lo khat sungin senator-ah kitel cing hi. U.S senator lakah a naupang pawl leh Delaware huamsunga senator hihna sawtvei a sem pen ahi hi.Kum 2008 kumin Vice predident sem a,Barack Obama tawh kithuah in Obama in Biden nasep hoih a sak manin term tawp lam ciangin civil mite a dingin pahtawina Presidential Medal of Freedom pia a,tua bek tham loin Biden pen U.S President a hih theih nadingin panpih hi.

A HUN MASA LAM

Biden pen kum 1942, November ni 20 ni-in Scranton, Pennsylvania-ah unau 4 lakah upa pen hi dingin suak hi.Apa Joseph Biden Sr.,pen mawtaw lui zuak khat hi a,a nuntakna uh haksa ahih manin Biden in apa nasep huh zel hi.Tua ahih manin haksatna ka thuak zawhna te pen ka nu leh kapa tung pan a,kasin hi ci-in gen hi.Apa ih thapiakna a manhilh theih loh khat in,Mihingte hong tehna pen bangzah vei puk khin hiam cih lam hi loin bangzah vei tho kik khin hiam cih lam hi zaw hi,a ci hi.

A naupan deuh laiin St. Paul’s Elementary School-ah kah hi.A pau awk pian ahih manin kampau lamah haksatna nei a,a lawmte in simmawh in zahpih uh a,sanginn pan kapkawmsa a,a ciah hun om thei zel hi.1955 kum ciangin Mayfield, Delaware lamah teeng uh a,tualai ah chemical company-ah sum thalawh kawmin sangkah hi.A upat ciangin Archmere Academy lamah lut hi.

ZI NEI

Delaware University-ah kah in,history leh political science la hi. Bahamas-a,a kahlai in Syracuse University sinlai ahi Neilia Hunter tawh ki mu uh a,ama genna ah hih pen ‘Love at first sight’ hi,a ci hi.A lawmngaihnu hangin a sangkahna laih in,Syracuse University lamah Law lam asin hi.A lawmnu tawh 1966 kum in kiteeng uh a,ta Joseph Beau, Robert Hunter leh Naomi Amy nei uh hi.

POLITICS LAM 

1968 kum ciangin law lamah graduate-in Delaware lamah ukil na sem hi.A mah pen Democratic Party hi a,tua khit ciang New Castle County Council-ah telcing ahhi.1972 kumin kum 29 pha a,Delaware Democratic Party min tawh Senate-ah Rupublican Party lam mi, Senate semlai ahi J. Caleb Boggs pen dem in a zo hi.

INNKUAN TUAH SIATNA

1972  kum December 18 ni-in, Senate-ah telcing ahih khit a sawt lo khat in,a zi leh a tate Krismas bazar dingin a paina uhah tractor trailer truck-in nataih hi.Tua accident-na ah a zi Neilia leh a tanu Naomi si pah uh a,a tapa te nih Beau leh Hunter zong na siatakin liam uh a,zato kipuak hi.Tua hun laitakin Biden zong lunggim in om a,Pasian na ngawn mawksak in amah leh amah zong kithah nopna lungsim nei hi.A nasep ding khawl kik sawm a,ahi zongin mipite telcing ahihna leh a lawmte thapiakna tawh a nasep zopkik ding ngaihsun hi.A tate ompih nuam ahih manin Biden-in Washington a,Quarter luah loin Wilmington a,a inn uh pan nisim in meileng tawh Washington pai zel hi.

Biden in 1977,June 17 ni-in Jill Jacobs pen a zi dingin tenpih hi.A mah tawh tanu khat Ashley nei uhhi.Tua khit ciangin nu tawh lo a,a om a tapa  Beau-pen khuak cancer natna hangin 2015 kum in si hi.Biden-in tuni dongin nasa-in thuak mahmah a,a tapa khat zaw Hunter-pen guihtheih zatui zang ahih manin apa in buaipih den hi.

VICE PRESIDENT LEH PRESIDENT

Biden-in kum 1987 in U.S President dem sawm a,ahi zongin vai tuamtuam tawh khawl kik hi.Tua khit kum 1988 in doctor-ten a nuntakna dinga a lauhuai khuak natna leh tuap natna a neih lam mu khia uh ahih manin manlangtak in at uh hi.Tua hangin kha sagih sung senate na sem thei loin om hi.

Kum 2007 in U.S President dem sawm kik a,ahi zong Hillary Clinton leh Barack Obama-te na hat zaw uh ahih manin a party min tawh ding zolo hi.Tua ciangin Obama in amah tawh a kithuah dingin Vice President dingin na koihto ahih manin US Vice President dingin kum 2009, January ni 20 ni-in kikipsak a,Obama tawh kithuah in nasem khawm uhhi. 

President Obama in Presidential Medal of Freedom a,a thugenna ah Biden thu gen in “America-in Vice President a neihsa te lakah mi hoih pen hi,ci-in gen hi.

Innkuan sung haksatna leh President dem ding a sawmna ah haksatna hanga a khawl kikna te,a tapa sihna hang leh a kum upat nate hangin President dem ding a sawm nawn lohna thu Biden-in genkhia hi.Ahi zongin a party mite hangin kum 2019, April ni 25 in President a dem ding thu gen kik hi.November ni 3, 2020 in US gamsung kitelna ah President a semlai, Donald Trump pen Biden-in zo ahih manin president ahi ta hi.

BIAKNA LAM

I gensa mah bangin Biden-pen Catholic innkuan pan a khangkhia ahi hi. Protestant gamah politics sem in,a thugenna te ah Catholic pawlpi ahihna thu zahpih loin gen zel hi.Anu leh pa zong thu ummi ahih mah bangin Joe Biden zong tuni dongin Sunday kikhop pelh ngeilo hi ci uhhi.Hun beisa sunga President kitelna vai a,buai mahmah lai in,Parish St. Joseph Church munah kikhawm a, US President kitel ni in, Wilmington Parish zingsang kikhopna ah kikhawm hi.A Spiritual Director Fr. Kevin  O’Brian in zong Biden phat mahmah a,kikhop hahkat in thunget hat hi aci hi.

2009 kum a Vice President a ngah lai in,ama min tawh a Spiritual Director Fr. O’Brian pen hun bawlpih dingin sam a,a innkuanpihte leh a lawm hoihte kikhoppih hi.President a ngah ciangin Catholic siampi khat hun zatpih dingin a sam hi.

Nupa kitenna lamah a zi masa Neilia pen Catholic pawlpi ah kiteenna bawl uhhi.A zi masa asih khit a tate a picin uh ciangin a zi nihna ahi Jill Jacobs zong Catholic siampipa thupha piakna tawh  kum 1977, June 17 in New York khuapi Chapel khat ah kiteeng uhhi.

Biden-in a-ipsungah Rosary kem den a,a tapa Beau khuak cancer natna tawh asi rosary pen a banah bulh zel hi.

Zomi history group