Abraham Thu tomkim

Abraham hauhna thusim

Abraham hauhna leh neihsa khempeuh koi munpan a ngah hiam?  Pasian kiangpan hi a, Pasian piak hiziau hi.  Hi dawnna pen a manpen leh a tompen hipah ding hi.  Ahizongin tuabangciangtawh i khawl kei dinga, Abraham gamtatna teng i en ding hi.

Pasian biakna

A masa pen in Abraham in vanlelei a bawl Pasian om ding hi cih upna nei hi.  A nungta Pasian na zong hi.  Milim biakna nusia in, a nungta Pasian biak ding khentat hi.

Tua a zon Pasian mahin Abraham samkhia hi.  Pasian cih bangin Abraham in mang hi.  A tuntunna ah Pasian biaknatau lam in, piakna tawh Pasian maipha zong masa den hi.  

Pian 12:7 ‘Tuaciangin Abram tungah Topa kilang a, “Na suanlekhakte tungah hih leitang ka pia ding hi” ci hi.  Tua a hihciangin a mah in a ma tunga kilang Topa aadingin biakna tau khat a bawl hi. A neu 8 ‘… tua lai mun ah zong a mah in Topa aading biakna tau khat bawl a, Topa’ tungah thu a ngen hi’.

Abraham in a paina peuhah nadang a sepma in Pasian tungah piakna tawh biakna nei masa hi.  Pasian zahtak masa den hi.  Hih gamtatna pen Pasian deih gamtatna taktak ahihna Laisiangtho muntampi ki mu hi.  Tua ahihmanin hih mipa tungah Pasian in thupha pia hi.  Lawhcinna pia hi.  Vangliatna pia hi. Thupha naak suaksak hi.

Abraham leh a sanggampa Lot a paikhia khawm hi napi Lot pen a deihhuai lualo in a nuntakna bei hi.  Laisiangtho sungah Lot in Pasian aading biakna tau lam in Pasian a bia hicih munkhat beek ah ki gelhlo hi.  Lot in zong Pasian maipha zongin, Pasian liansak in, Pasian zahtak hileh a khanggui hihsang a hoihzaw ding hiam cih ngaihsuthuai mahmah hi.

Abraham in a neihsate tawh Pasian zahtak hi.  Kumpi nga kipawl khempeuh a zawhciangin hauhna, neihsa, nasem numei pasal tampi ciahpih hi.  Galzawhna pan a ngah khempeuh lakpan in Pasian siampipa kiangah sawm ah khat va puak hi.

Abraham in tua nate lakpan mimkhau a hi a, khedapkhau ahizongin na khatbeek lalo hi.  Ahizong Pasian aadingin sawm ah khat lakhia hi.  Hibang a deihhuai in Abraham in Pasian tungah biakpiakna a bawl hi.

Eite in zong Pasian tungah lungdamkoh biakpiakna a hizongin, neihsa lamsate, sawm ah khatte a hizongin Pasian tungah biakpiakna i bawl ding hoih hi.  Biakpiakna sungah Pasian hong lungkimleh a thupha in hong zui ding a hihi.

Pasian in leitungah tuicin tungsak in Noah’ tembaw sunga omlo nuntakna nei khempeuh beisiangsak hi.  Noah tembaw sungpan hong tuah ciangin Pasian in leitung mikhempeuhte aadingin kamciamna leh thupha lianpi hong pia hi.

Pian 8:20-22 sungah ‘Tua ciangin Noah in Topa aading biakna tau khat lam a, a siangtho ganhing khempeuh le a siangtho vasa khempeuh lakpan khat ciat la in biakna tau tungah meihal biakna a pia hi.

Topa in a namtui gimnam a zakciangin a lungsim sungah ‘mihing gamtatna hangin leitang ka samsia kik ngei nawnkei ding hi.  ...Tu a ka hihbangin nuntakna nei khempeuh zong ka susia ngei nawnkei ding hi.  Leitung a omlaiteng lopawi hun leh anlak hun, a vot le a sa, khuakhal leh phalbi, sun le zan beilo ding hi’ a ci hi.

Tuni mihingte bangzahtak i gamtatsia zongin Pasian in leitang samsia nawnlo hi.  Lopawi hunleh anlak hun hong pia hi.  Noah biakna hangbekbek in tuni leitungah lo a khothei, an a lathei, sum a bawlthei, a hau thei, a nungta thei i hihi.

Tua a hihmanin Pasian maipha zonga, piakna tawh biakpiakna pen a hau nuam mi, Pasian kiangpan thupha a ngah nuam mi in a sep ding kilawm mahmah ding hi.  Tuabangin Abraham in tamveipi Pasian maipha na zongden a hihmanin Pasian nangawn Abraham tungah ‘thupha kong pia ding hi’ ci in ki ciam phapha hi.

Credit: