Issac Thu tomkim

Issac thu zomkik pak ni

Biakpiakna

A nihna ah: Issac in zong Pasian tungah piakna tawh biakna nei hi.  Pian 26:25 sungah ‘Tua a hihciangin a mah in tua lai munah biaknatau khat lam in Topa bia a, tua munah puanbuk a lam hi…’ ci in ki gelh hi.

Issac in a tapa Esau tungah ‘nang thupha kong piak theih nadingin kei duh bangin anlim hong bawl inla ka nek dingin hong paipih in’ ci hi.  Pian 27:4.  Esau in a pa kiangah anlim a puak main Jacob in na puak masa hi.  A pa in ne hi.  Tuaciangin thupha piapah hi.

Issac in Jacob thupha a piak mahbangin Pasian tungah a siangtho, a deihhuai, a lungkimhuai khaici hoih a tuh mi peuhmah Pasian in thupha pia hi.

Laisiangtho sungah Jew mite a hilo Balaam thu kimuthei hi.  Balaam pen Pasian tel mite hilo napi Pasian tawh a ki hothei mipa a hihi.  Balaam in thu a nget ma in biakna tau sagih tungah bawngtal sagih leh tutal sagih ta tawh (Israel te etteh in) Pasian tungah biakpiakna pia masa den hi.  Tuahangin a thungetnate Pasian in dawng denpah hi.

Tuhun ciangin gango sago in meihalbiakna ki zangnawnlo a, Pasian nasemte tung, mi zawng mi cimawh te tung leh Pasian minthan nadingin piakna khempeuh Pasian a lungkimsak biakpiakna a hihi.

Tuabang piakna pen mawhmaina ding leh vangam tunna ding a hihpahloh hangin leitungah nuamsa tak in nuntak theih nadingin Abraham, Issac te’ gamtatzia ki etteh thei ding hi cihthu a hihi.

Tua a hihmanin piakkhiatna (Pasian deihna bang a piakna) pen hauhna thusim lianpi khat hi a, Jew mite in a khang a khangin a zatuh thusim khat  ahihi.

Khaici tuhna

Pian 26:12  ‘Issac in tua leitangah khai tuh a, tua kum mah in a zah zakhat la hi.  Topa in a mah thupha pia a, a neihsa ki behlaplap a hihmanin a hau mahmah khat a suak hi.’  

Pasian in Issac pen khaici tungpan in thupha a zah 100 pia hi.  Khai pawi hun leh anlak hun ka beisak kei ding hi a ci Pa in ciampel lo hi.  Leitang mahmah pan in thupha hong pia hi.  Tua dingin Issac in khai tuh hi.

Leitang tungah khaici vaimin, buh cihte i tuh bangin Pasian tungah khaici manpha i tuh ding hong hilh hi.  Topa Zeisu in zong leihoihna mun ah  a kia khaicite a zah 100 dongin  a khang hi ci in hong gen hi.

Pasian’ min le gam aading, Pasian nasemte tung, mizawng micihmawhte tungah piakkhiatna pen leitanghoih tungah khaici tuhna tawh kibang hi.  Tua a hihmanin hauhna sumlepai i at nopleh tuni in khaituh ding a hihi.

Khaici tampi a tuhte in tampi mah at ding hi cihthu phawk ding a hihi.  Khaici tuh hun dingpen zingciang hilo a, tuni hita hi.  Zingciangin anlak hun a hihi.

Credit: