KHUTCIN KANG (LUNULA) THU

KHUTCIN KANG (LUNULA) THU

Khutmecin 10 te en lecin na cin bul ah khade tawh kibang a kual in a kang om ding hi, tua pen Lunula ki ci hi.

Tanglai pek a kipanin Chinese te in mihingte cidamna leh natna te cinkang Lunula pan en thei uhhi. Na khutme te ah khutcin kang Lunula na nei hiam, Lunula a tam leh a lian a neite a cidamna hoih mahmah hi ci uhhi. Khutmecin 8 tung siah a kangte cidam mahmah hi ci uh a, khutcin kang na neih mel kei leh doctor zuan inla, ki check up sak in. Khutcin kang a nei tawm lua te a pumpi mun tuamtuam ah damlohna, hatlohna, natna nei cih na ahihi. 

Lulunla kitel tak in a nei te pen na ci a bul lam teng seh nga suah seh khat khade tawh kibangin a kang a om nak leh a hoih ahihi. Picing khin sa ah khutcin kang nei vetlo om ve ve thei hi, khutcin kang neihloh manin cina, natna nei ing cih bangin kingaihsun tuan ding hilo hi. A zaw deuh in naupang te in nei khol uh a, a gol ciangin nei zaw uhhi. Lunula pen ngek mahmah a, a siat leh cin khempeuh kisia thei hi. Lunula neu lua leh tawm a nei lua te in natna ngah baih uhhi. Zan ciang sawtpipi a hakte in Lunula nei khol lo uhhi. Lunula neihloh pen ci na, damlo cihna hipah tuanlo na pi in a ci na leh nak nat(serious) mahmah hi. 

                                

Lunula te pen neklehdawn, khuahun leh cidamna tawh kizui in kilamdang thei hi. Gilpi hatlo, sung hoihlo, na khat peuh ne leng sunglam nasep na te hangin zong cin mel kilaih in a kang bei thei a, protein kisapna hang leh teh hing lam tam nek ding ih kisapna hang zong hithei hi. 

Tua ahihmanin  khutcin ah Lunula lian leh sisan pai ( blood circulation) hoih cih na hi a, khutcin kang a neu leh sisan hatlo cihna ahihi. Khutcin kang themcik zong a om kei leh Red blood cell tawm cih na hi a, khut leh khe vot dikdek thei hi. 

Khutcin a Lunula in mel tuamtuam nei hi;

1) Ivory colour(Saiha pak)  :- Hih Ivory mel pen Saiha pak mel kici hi, a hoih pen ahihi. Hih bang Lunula mel a nei te pen thahat, na vak, cidam tangzang uhhi.

2) Gray colour (Vut mel) :- Hih Gray pen Vut mel ki ci hi. Khutcin vutmel a nei te tha (energy) neilo uh a, La, gilpi leh an gawizan lam ah hat lo in tawl baih uhhi. 

3) Pink colour (sandang) :- Hih Pink mel pen a sandang lam hi in cin mel ngeina ahihi. Hih Pink colour cin nei te pen gil sung lam leh gilzang lam hatlo a, zunkhum leh thyroid natna te nei thei hi. 

4) Purple colour (Sanpuang) : Khutmecin a Lunula mel Sanpuang in a om leh sisan hatlo (blood circulation) a, Oxygen tawm ahihmanin lu vai leh lutang na hi. 

5) Black colour (a vom) : Khutmecin cin Lunula mel a vom leh lungtang na, cancer, metal poisoning(zatui nekna hang) cih te nei hi. 

Khutme tuamtuam a Lunula te;

1) Khutpi cin Lunula : Khutpi pen tuap leh La tawh kizom pen a, pink colour a neih leh sinkha hoihlo cih na hi a, bukvei baih in tha bei baih hi. Zunkhum neihna hang a om a hih kei leh zunkhum ngah ziau thei hi. 

2) Khutmekawk Lunula : Khutmekawk pen gilzang leh gilpi tawh kizom pen ahihmanin pink colour a hih leh gilpi leh gilzang te hatlo cih na hi a, ankam lim lo hi. 

3) Khutmelai Lunula : Khutmelai pen khuak tawh kizom pen ahihmanin pink colour a hih leh Psychentonia natna nei cih na hi a, luvai, lutang na, na ciamteh thei lo, ihmu theilo, om miaimuai cih te in om thei hi. 

4) Khutzung bulhna (ring finger) Lunula : Khutmeneu zom zong ki ci a, a paikhia leh a pusuak te tawh kizom pen ahihmanin pink colour a neih leh thahat lo, om nuamlo cih na ahihi. Numei te khasi neih man nawnlo in numei natna tuamtuam nei thei hi. 

5) Khutmeneu Lunula : Khutmeneu pen Lungtang leh kal tawh kizom pen ahihmanin Khutmeneu ah khutcin kang Lunula om ngei phalo a, khuasik leh cisa natna hangin om thei hi. Lunula a mel san a om leh Lungtang natna serious mahmah hang hithei hi.

Khutmecin ah Lunula a om leh a lian te a hoih hi ih cih hangin a lian lua te natna hang hithei leuleu hi. Mipil leh misiam a thei te in khutmecin a Lunula om tawh kisai in cidamna leh natna gen thei uhhi. 

Lunula pen cin tawh kizom pah in om thei a, cin laizang ah zong om thei in, cin sung a thagui neu mahmah (capillaries) te kitat/kitam leh zong cin sung san sak thei a, tua bangin na cin sun a san leh  Splintered hemorrhages ki ci kal leh a tuamtuam hoihlohna hangin zong om thei hi. 

Lai Siangtho in khutmete a genna;

Ka khutte galdona ding, ka khutmete galkap nadingin a hilh, keimah a hong hu, Topa in thupha ngah tahen. (Late 144:1)

Ka ngaihno tumsak dingin ka kithawi a, ka khutte myrrh paknamtui tawh ka zut a, ka khutmete myrrh paknamtui ka nuh a, kong a hong dingin a honna ka len hi. (Solomon la 5:5)

Bang hang hiam cih leh na khutte uh mi thahna sisan tawh nin a, na khutmete uh mawhna tawh a nin hi. Na mukte un zuauthu gen a, na leiite un gitlohna thu a gen hi. (Isaiah 59:3)

Jesuh in zong mihonte omna panin tua mipa paikhiatpih a, a mipa’ bil tegel sungah a khutmete guang a, tua ciangin a khutmete cil nuhin a leii lawnsakin vantung lam ento a, khuisa-in, “Kihong in,” a cihnopna ahi “Effatha” a ci hi. Thakhatin a mipa’ bil kihongin, a leii zong hong kol a, nuamtakin a pauthei hi. (Marka 7:33-35)

Amaute kong kikhaknelh uh hinapi-in Jesuh hong pai-in amaute lakah hong ding a, “Nopna ngah ta un,” ci-in a hopih khit ciangin Thomas kiangah, “Na khutme tawh hong lawng inla ka khutte en in. Na khut zan inla ka pangpi zong lawng in. Umlah nawn kei inla, um taktak in,” a ci hi. Thomas in zong, “Ka Topa, ka Pasian!” ci-in a dawn ciangin Jesuh in, “Kei na hong muhkhit ciang bekin hong um pan na hi hiam? Kei hong mu lo napi-in hong umte adingin lungdamhuai mahmah zaw ding hi,” a ci hi. (John 20:26-39)

A gelh : NK Nang