PASAL PIL LEH PASAL HAI

.            Pasal Pil le Pasal Hai 

.          🏋️🏋️🏋️🏋️🏋️🏋️🏋️🏋️🏋️

🦸 Numei hai le numei pil thu ka gelh masak hun lai-in Pasalte zong a pil le a hai om sam lo ding hiam cih dotna pawlkhat ngah ka hih manin, tuin pasal pil le pasla hai kilamdanna hong gelh ka hi hi. 

🦸 Hih ka laigelh pen mimal thu genna khat zong om kilkel lo ahih manin mimal lungsim nat tuam nading zong om lo hi cih kong theisak nuam hi. 

1.. 🦸 Pasal pilte in ama hangin a innkuanpih a zi a tate a koi ciang kilamsang a, a zi a tate adingin amah bang dinmun ah ding cih tawh amah le amah a thupitna le a manphatna kiciamteh hi. 

Pasal hai ahih leh a innkuanpih a zi a tate ading bang teng sepsak bawsak a, bang dinmun ah amah om cih sangin a suah cil pan a neih bangin a kigen pasal khat ii manphatna tungah amah le amah kiliansak-in a innkuanpih a zi a tate tungah thuneih ding ngaihsun den hi. 

2...  🦸 Pasal pilte in a zi tawh tut  khop khawl khop nuamsa uh a, a zi tawh kithuah khop ding lunggulh ahih manin, a zi tawh kam kikum khawm a, a kithuah khop theih nadingin a zi tawh ankuang sawp khawm thei a, puan zong sawp khawm thei-in an zong su khawm thei uh hi. 

Pasal haite in ahih leh a zi in amah tawh ut kawm kawl khawm nuamin neihneih hi mah leh inn sung nasep ding bei ta ahiam ci-in a khiang panin a zi hawl khia zaw thei uh hi.  Tua bek tham loin a zi tungah a thuneihna a lah theih nadingin a zi in bang teng sem khial bawl khial hiam ci-in a mit ciimsak mahmah hi. 

3.. 🦸 Pasal pil in itna khau tawh a zi khih hi. Itna cih pen it a thuakte ading bangci cih leh nuam thei ding cih lam thupisak zaw den hi. Amah itna sungah a zi bangci lungkimsak ding cih ngaihsun den hi.

Pasal hai in ahih leh itna le hazatna khentel thei lo ahih manin itna a cihcih hangin it a thuak a zi adingin dahna le lungkhamna sungah kihencipna tawh kibang thei hi. 

4.. 🦸 Pasal hai pawlkhatte in a zi kawk theih nadingin a zi gamtatna luite sung pan mawhna khialhna kaikhawmin khol toto uh a,  a zi pen a kicing zo het lo, mawhna khialhna tawh a kidim bangin a zi mawhsak den thei hi. 

Pasal pilte in ahih leh a zi mawhna khialhna meisak zo den cih ahi kei zongin a beisa mawhna khelhnate tung pan pilna le thumuhna ngah zawh nadingin itna le deihsakna tawh awnem zangin kampau thei uh hi.

5.. 🦸 Pasal pilte in leitung ah sin ding le kan  ding thu hoih la hoih tampi om a, tua thu hoih la hoihte bei thei lo zah dongin tam ahih manin amah le a innkuanpihte adingin bang teng thupi a, bang teng kisam hiam cih ngaihsun-in thuthak kantel toto uh hi. 

Pasal hai in ahih leh ama theihsa thu teng zong kicing khin a ci bangin a innkuanpihte tungah ama lungsim le ngaihsutna bek mah a dik a man bangin uk thei hi.

6.. 🦸 Pasal pilte in a lawm a gualte le mipi mai ah a zi pahtak a piak ding haksa ngaihsut ngei lo hi. A zi lungdam nading le kipah nading ahih nak leh a lawm a gual dangte muhna ah etlawm khol lo phial hi mah leh zong ama adingin a zi lungdamna le kipahna thupi zaw ahih lam ngaihsun thei ahih manin a zi lungdam nading le kipah nading mah masasak zaw den hi. 

Pasal haite in ahih leh a lawm a gualte le midangte muhna ah zi lel cih min pua nuam lo bek zong hi loin mipi muhna le a lawm a gualte muhna ah bang zahtakin a zi zo ahih lam kilangsak nuam thei uh hi. A innkuanpih a zi a tate’n a thu bang zahtakin zui uh a, bang zahtakin zahtak-in lau uh hiam cih kilangsak nuam thei uh hi. 

{ Pasal pawlkhatte amau nupa bek om uh leh a zi hampha mahmah tawh kibang napi midangte mai ah a pasal in ama hihna a kilatsak nop luat manin a zi in lunggim a thuaklawh pawlkhat om takpi uh hi.} Zi lel cih min pen pasal pawlkhatte in tangkhatui cik mahmah bangin ngaihsun uh a, pawlkhatte in ahih uh leh zi lel cih pen  a zite uh a it thei lo itna lungtang nei lo pasal pawlkhatte kammal hi ci lel uh hi.

7…  🦸 Pasal pilte in a zi pen numei ahih lam theitel ahih manin a zi tawh kam kinial a kitot ding ahi thei zahin pelh den hi. A zi numei ahih lam thei cih ciangin a tomin gen ding hi leng, kampau tawh kisai-in mihing khuak kilamzia ah numeite pen pasalte sangin kam tam zaw uh ahih manin kam kinialna peuhmah tawh pasal in numei a zawh ding baih lo hi ci-in mipilte in sittelna pan mu khia uh hi. Tua hangin nupa kam kinialna peuhmah a tawpna en ding hi leng pasal in a khut zang den pian uh hi. 

Pasal haite in ahih leh numei pasal kilamdanna cihte bang mah thei lo, kantel lo ahih manin a it a ngaih mahmah a zi nangawn a hehpakna thu khat hangin pasal le pasal kito bangin sing le suang nangawn tawh vuain saat thei hi. 

Gelh ding thu tampi om lai ahih hangin thu a sau luat ciangin laisimte adingin zong cimtak huai thei ahih manin tua zah kong gelh phot ding hi. 

Numei Pil le Numei Hai thu na sim nop leh hih link mek ziau in. 

Job Cinpi

Zomi Laisim nuamte