Daniel Thu tomkim

Daniel hauhna thusim

Pumpi sianthona

Daniel pen Babylon kumpipa khutsungah sila nasep a sem dingin Jew gampan in a kipaikhiatpih mi a hihi. Daniel lungtang sungah Pasian zahtakna om hi. Leitung thanghuaina khempeuh nial hi. Tuahunlai sila cihte pen kumpipa in a utbangin thatziau thei hi. ‘That un’ cileh thusitna omlo, mawhmatna kisamlo in sihdan a kipiak ziauziau hun a hihi.

Ahizongin Daniel in kumpipa Nebukhadnezzar thupiak nial in pumpi sianthona tawh Pasian maipha zong hi. Pasian mi a hihna maizumpihlo hi. Dan 1:8 sungah ‘Daniel in kumpi inn sung a an le lenggahzu tawh a pumpi a thanghuaisakloh nadingin a lungsim a khensat hi’ ci hi.

Tua lungtang hangin Pasian in Daniel hehpih a pilna pia hi. Daniel 1:20 sungah ‘Kumpipa in bangbang thuhaksa nono a dot hangin , hih mi li te pen a ma gamsung khempeuh a mitphial siamte le aisan theite khempeuh sangin a zahsawm in a siamzawklam uh a mu hi’.

Kumpi pa mang a khiatna a genthei Babylon emperor sungah kuamah omlo hi. Kumpi pa heh mahmah ahihmanin a gamsunga om mipil a kicikhempeuh thah dingin sawl hi. Tua mang leh a khiatna a gensak thei Babylon gam sungkhempeuh ah Jew mi a hi Daniel khatbek om hi.

‘...Kumpipa in, “hih thuthuk a lak, pasian khempeuh sungpan a lian pen, kumpite’ tunga Topa a hihi” a ci hi. Tuaciangin kumpipa in Daniel letsong tampi pia a, a za liansak a, Babylon gamteng uksak in, Babylon mipil thudotte a ukpipa dingin a koih hi’. Dan 2:48

Nasepna paubanna omlo

Darias kumpi pa hun ciangin Daniel ki lehhek nuam hi. Daniel pen a nasepna ah citak mahmah a, mawhzonna ding malkhat zong ki mu zolo hi. A mawhmat nading mu zolo a hihmanin kumpipa kiang lo ngal, pasian dang kiangah thu a ngen peuhmah humpi nelkai kua sungah ki khia ding cih lai hawmkhia uh hi.

Dan 6:10 ‘Tuabang lai ki hawmkhia khinzo hi ci in Daniel in a theih ciangin a inn ah a ciah hi. A inn dawl tungnung ah Jerusalem lam a nga tawlet thum a om hi. Tua laitak ah tawlet honsa in a hih ngei bangin khukdin in ni khat in thumvei ta Pasian kiangah thu a ngen hi’.

Humpinelkai kua sungah a kiat dinghangin Daniel in Pasian muang hi. Pasian in ompih a sihna dingpan honkhia hi. Dan 6:28 sungah ‘Tua ahihmanin Darias kumpi a hihlaitak leh Persia mi Sairas kumpi a hihlaitak in Daniel nuamsa in a om hi’.

A nasepna ah citak mahmah hi. Khuk din ngiungeu sa in nikhat thumvei ta, nisim in thu ngen den hi. Tuahangmahin leitungah gamkhempeuh ah a lianpen Babylon gam sungah thuvaihawm, pahtawina sangpen a ngah Daniel hong suak hi.

Babylon kumpi te a vangliat dan pen Dan 5:19 sungah ‘A mah lianlua mahmah a hihmanin gam khempeuh, nam khempeuh, pau khempeuhte in kihta in a liing uh hi…’ ki ci hi.

Tom genkik leng: Pasian zahtakna a nei Daniel, Pasian hangin a ki siangthosak Daniel, Pasian a muang Daniel, a nasepna peuhah paubanna a om kiuhkeuhlo Daniel, nisim khukdin in thu a ngen den Daniel a hihnate i etteh theih ding hanciam ding hihang.

Credit: