Job Thu tomkim

Job hauhna thusim

Job pen Jew mi taktak hi ci in ki gen theilo hi. A piankum ki genlo, a pa min ki genlo hi. Jew mi ahikei phial zongin hih Job hauhna thusim zong theihhuai veve ding hi.

Job hauhna pen leitungbup ah minthang hi. Hauh cihtak in hau hi. Tua bek hilo in Job omna, a gamtatna, a nasepna khempeuh ah Pasian in daikai in a cin, a kep ngiat Job a hihi. Pasian in midik ci in ciamteh a, a muan taktak mihau Job a hihi.

Job hunlai in Pasian in Job tawh kibangin thupha a piak midang omlo hi. Banghanghiamcihleh Pasian in satan kiangah ka midik Job na mu hiam? ci bek hi. Ka midik tuate tuate na mu hiam? ci lo hi. Tua ahihmanin tua huntaitak in leitungbup ah Job sangin Pasian maipha a muzaw, a nuamsa zaw, a lawhcingzaw omlo ding hi.

Mawhna bawllo

Job nuntakna en leng: Job 1: 1-5 sungah ‘Job in a paubanglo, a thutang, Pasian a zahtak mikhat hi a, nisuahna gam sungah Job a haupen khat a hihi. …Job in a tapate sam in siansuah a, zingsang thobaih in a ta phazahtawh kizui in meihal biakna a pia hi… Tua bangin Job in hih tawntung hi’. A etteh huai mahmah Job gamtatna ahihi.

Nasepna ah paubanglo, mizawng mi cihmawhte neihsa mawksutlo hi. A hauh mahmah hangin zawhthawh thu zang vetlo hi. Thu tang den hi. Pasian zahtak hi.

A tate mimal phazah tawh kizui in zingsangin Pasian mai ah biakpiakna pia den hi. Hibang mi lawhcing mahlo ding hiam cihnophuai ka sa hi.

Pasian tungah lungkimden

Job in Pasian mawhsak ngeilo hi. Ziaetna thuak in a neihsa khempeuh a bei ciangin zong ‘Topa in hong pia a, Topa mah in hong lakik hi. Topa min kiphat ta hen’ ci lel hi. Job 1:21. Zawnna leh hauhnate tawh Pasian a phat hilo a, a hihna bangbang tawh Pasian zahtak in Topa min a phat Job nuntakna a hihi.

Pasian mai ah thutangin a thudikna maitang kituah in a gennuamliang a hihi. A lawmmipilte kiangah ‘ka mawhna nong muh uhleh hong lakkhia ta peuh un’ ci in to ngam hi.

Gamtatna bek hilo in mitmuhna nangawn tawh khial a kisa kiuhkeuhlo Job a hihi. Job 31:1 sungah ‘Lunggulhna tawh nungak khatpeuh ka et ngeiloh nading kiciamna ka bawl khin hi’.

Aneu 4-7 sungah ‘Pasian in ka gamtatna khempeuh thei a, ka kalsuanna khempeuh a hong mu hi. Ka gitloh gamtat ngeilohna, kua mah ka khem ngei hetlohna , ka gamtat hoihna thute ah ka kiciam ngam hi.

Pasian in tawikhaina man ah hong tawikhai hen: ka paubaan hetlohna hong mu ding hi. Lampi man pan in ka pial a, siatna lam ka zuih a, ka khut tungah mawhna a baan taak leh…’ ci ngam hi.

Job pen ei mahbangin mihing khat hinapi banghang hizah in siangtho zo hiam? Job gamtatna pen thu um mi khat kimciat in i etteh mahmah ding kisam ding hi.

Gamtat hoih manin Pasian hehpihna a kingah a hipah kei phial zongin Pasian a zahtakte gamtat hoih a, Pasian in tuabang mite mah lamto in thupha pia hi. Daikai in kem in cing hi.

Satan ziaetna ah Job puklo hi. A pau khauhnate kisik in Pasian in a mawhna maisak hi. Pasian in thupha pia kik hi. A piaksa thupha a zahnih in behlap hi. A masa in nisuahna gam ah a haupen Job a hihi.

A nununglam ah Pasian in a zahnih hauhna piakik a hihmanin leitungbup ah a haupen hi ding hi. Job tanute zah in leitungah a hoih nungak dang a om kei hi ci lai hi.

Job nuntakna sungah thuman cihtakna, gamtat hoihna, lungsim pumpi ki kepna, Pasian a zahtaknate i etteh mahmah ding thupi ding hi.

Credit: