Mordecai Thu tomkim

Mordekai hauhna thusim

Hun hoih ngaksiam

Mordekai pen kumpi nasem khat hi a, Ahasueras kumpi pa’ kongcing a hihi.

Mordekai in kumpite langpanlo hi. A nasepna kumpi pa inn sungah citak hi. Kumpipa a suamsim nuam mite zong kumpipa kiangah imsim lo in genkhia hi. Hih pen a thumanna leh a cihtakna khat a hihi. Tuahangin pahtawina a ngahpahloh hangin phunselo hi. Pahtawina deihna tawh nasemlo cihna hong lak hi.

Kumpi nu dingin Esther a ki tel ciangin zong ‘ka ta nu tuin kumpi nu hita’ ciselo hi. Ki theihmawh bawl in om hithiatlel hi. Ki gen hileh Esther hangin laptohna zong ngah kha ding hi. Ahizongin mite laptoh ding sangin Pasian laptoh ding hun ngak zaw hi.

Mite sangin Pasian muangzaw

Jew mi Mordekai lungsim sungah Pasian zahtakna om hi. Pasian bek muan in nei hi. Pasian a hilo mi, milim a hizongin tuate maiah zahtakna pia in lukhun dingpeuhmah ngaihsun zo ngiatlo hi.

Mikhat mai ah a kun dingsangin, milim khat mai ah a kun ding sangin a si ngam zaw Mordekai a hihi. Esther laibu simleng teltak in ki mu hi. Pasian bek a cihcintenna hangin Pasian in sihna dingpan in honkhia hi. Honkhia bek hilo in, a mangmat ngeiloh, a lam et ngamloh ding minliatna, thuneihna, pahtawina leh hauhnate pia hi.

Gam 127 sungah thuneipen, thuvaihawmpen, kumpi thudotpen dinmun lunggulh huai in, nak deihhuai mahmah ding hi. Esther 10:3 sungah ‘Banghanghiamcihleh Kumpipa Ahasueras’ zom ah Mordekai a lianpen a hihi’ ci hi.

Jew mite a kizatna hi a, Pasian bek a zahtak lungtang pan a ngah hamphatna ahihi. Hih lungsim puakzia zong ei te khempeuh in i etteh thei ding hi.

Credit: