David Thu tomkim

David hauhna thusim

David in:

1. Pasian phat, Pasian pahtawi

2. Mi deidanlo

3. Lungsim khempeuh tawh kisik

4. Pasian sathau nilhte khoihlo

5. Pasian thu dong masa den

6. Kilemna deih

7. Lungdamko siam

Pasian minphat

David pen mizawng innkuan pan a khangkhia a hihi.  Pilna neilo cihtheih a hihi.  Ahizongin David in Pasian zahtak hi.  Tumgingte leh lasakna tawh  a tuu cinna mun ah nisim in tamngai tumin Pasian minphatna la sasa hi.  Ama bawlsa nalianpite en kawm, ngaihsun kawm in Pasian phat hi.  Tua in Pasian lungdamsak hi.

Pasian in a mah a pahtawite pahtawi hi.  David zong tuu cinna pan kumpi inn dongah lamto hi.  Lasakna tawh dawi, khanin hawlkhiat theihna zong Pasian in pia hi.  Tuahiaa a masa pen in Pasian phatna leh lasakna tawh Pasian maipha a mupa a hihna i etteh theih ding kisam hi.

Tuabek hilo in David in Pasian it mahmah hi.  Nakhempeuh ah Pasian hang hi ci ngiat hi.  Mawhna a bawl hunciangin Pasian maiah ki sikkik thei hi.  Hauhna, kumpi za, minliatna khempeuh sangin Pasian itzaw hi.  A silh a ten khempeuh kia khia liangin Pasian minphat in a lampa a hihi.

Late Laisiangtho sungah David in Pasian a lunggulh ngeungeunate kiciantak in ki gelh hi.  Pasian muangin Pasian lunggulh ngeungeuna pen hauhna leh khantohna khempeuh ii bulpi a hihi ci in a gennuam i hihi.

David in gal a do dingsim in Pasian dong masa den hi.  Pasian in phalna a piakciangin galsim dingin kuanpan hi.  Hihpen a hoihmahmah Pasian in thupha a piaktheih gamtatna khat a hihi.  I hihna peuhah Pasian makaihna i ngah ding hoih hi.

Milian mineu deidanlo

Pasian sathau nilhte simmawhlo hi.  Tua mite tungah khutkhial lo hi.  ‘...Topa’ sathau nilhpa a su peuhpeuh mawhna pan peng ding sa nahiam?’ a ci hi.  ISam 26:9

Kumpi innsungpan maizum in galtai in a omlai in Shimei in zahpih in kosia hi.  A nungzuite in ui banglel a hi Shimei thahlup dingin ngen uh hi.  Ahizongin David in phallo hi.  IISam 16:10 ‘... Topa in a ma kiangah ‘David samsia in’ a cih hileh...’ ci in khoihlo hi.

Pasian sathau nilhte zong Pasian hangin khoihlo hi.  A mah a kosiate zong Pasian sawl hikhaleh ci in khoihlo hi.  David ki niamkhiatna lungsim hong ki langsak mahmah hi.

A baihsabek lamen ngeilo

Nakhat peuhpeuh a mawkna leh a baihsa in ngahziau ding cih lungtang nei hetlo hi.  A ma thatang tek tawh a zi a lei nading galsim in vundawn la ngiat hi.

Tui duh dangtak in a omlaitak in a galkapte in luangkham in tui tawisak hi. Ahizongin David in tua tui nuntakna tawh a ki thalawh tui a hihmanin ka dawnkei dinghi ci in Pasian biakna in nei zaw hi.

A gam sungah pulnatna hong tun ciangin dah mahmah hi.  Tua pulsihna a bei nadingin Pasian aading biakna tau a lam dingin Pasian in sawl hi.  Biaknatau lam nading mun leh nakhempeuh Araunah in phaltakin pia khia hi.

Ahizongin David in ‘Hilo hi, nangma tungpan in a manh tawh kituak in kong lei ding hi.  Topa ka Pasian tungah kei sum beilo in meihal biaknate ka pia kei ding hi’ a ci hi.  Tua  ahihciangin David in ngun shekel sawmnga tawh ancilna mun leh bawngtalte a lei hi.  IISam 24:24

A etteh huai mahmah David lungsim puakzia leh a gamtatnate tawm a genpak i hihi.  Nulehpa, U le naute’ zonsa peuh, lawmlegual leh venglepamte’ huhding peuh lam en in om maimai hetlo ding cih hong hilh mahmah hi.

Ei ma thatang tektek tawh, ei ma sumlepai bei mah in nasem in nuntak ding a thupi zia hong lak hi.  Tuabang mite mah in Pasian maipha mu in Pasian laptohna a ngahna i mu thei hi.

Credit: