Moses Thu tomkim

Moses Thu tomkim

Moses hau hiam? Moses pen Israel mi tul zatampite’ makaipa a hihi. A khangno laipek pan in minliatna leh pahtawina ngah hi. Faro mai ah a din ciangin zong Pasian in maipha pia hi. Faro aadingin pasian zah dongin Pasian in lamto hi. Hihpen hauhna mah hi a, a deihhuai mahmah hauhna cihtheih a hihi.

Itna nei

Moses pen itna innkuan sungpan khangkhia hi. A innkuanpihte in ittawplo in Moses it uh hi. A innkuante in Faro kumpipa thupiakna nial in sihding nangawn laulo in Moses it uh hi. Tuamahbangin Moses zong itna a nei ngiat mi hong suak hi. A minamte it tawplo in it hi.

Moses in a mipihte a it manin a nuam mahmah kumpi innsung pan in galtai pa hong suak hi. A gal tai hun in Moses in ‘nikhat ni ciangin minam makai ka suak ding hi. Pasian in hong zang ding hi’ cihte a theikhol hipeuhmahlo hi. Itna, veina khatbektawh a gamta mi a hihi. Kumpi inn sunga thunei pa, kumpipa tapa cihdingsangin a minamte itzaw hi.

Egypt gam pan Israel mihonpite tawh gamlak a pailai un a mipihte in Pasian hehsak uh hi. Pasian in Israel mite khempeuh suksiat beisak ding Moses tungah gen hi.

Tuaciangin Moses in Pasian kiangah ‘...Ahihhangin nangmah in tu in a mau’ khialhna maisak in. Na maisak kei dingleh hong thum ing, nangma gelhsa laibu pan in kei mah hong phiatmai in a ci hi’. Pai 32:32

Moses lungsim puakzia pen itna sungah ki bulphuh in, maisakna ki dim ngiat hi. Gam leh minam itna, veina leh lainatna a neitaktak, minamte tangdingin sihna nangawn a telngam lungtang i etteh ding thupi mahmah ding hi. 

Pasian in Moses pilna leh siamnate zanglo a, ahizongin Moses lungtang sunga om minam itna Pasian in thupi san a, tuamah zatsak hi. Tuahang mahin tuni in Jew mite hauhna thusim cih laibu a gelhthei i hihi.

Thuhilhna ngaisiam

Moses in mi tulzagukvalte makaih in thubuai a neihciangin a thu khensak hi. Pasian tawh hun la nuamzel, a mipihte thubuaite khensak zel a hihmanin a hun kicingzo mahmah lo hi.

Tuabangin a omlaitak in a sunghpa in Moses thuhilh a, a ma nuai ah a tultul a uk, a zaza a uk, sawmnga uk leh mi sawm a uk cihbangin koihsak hi. Thubuai a omciangin tua mite in khensak hi. Tuate khen zawhloh thulianpite bek Moses kiangah ki puak hi.

A sunghpa hilhna makaihzia a zatsiam nipan kipan a vangik tampi kidawn in a makiahna ah lawhcinna lianpi ngah hi. Tuni dongin hih makiahzia ki zanglai a, inn sawm uk dongin i vengah makai ki nei hi.

Moses in ki niamkhiat hithiat in thuhilhna a ngaihsiamna pan a ngah hamphatna a hihi. Pasian kamsang, mi tul za tampite makai pa in mi thuhilhna mang hithiat cihpen a picing mahmah lungsim a neihman a hihi.

Leitung i nuntakna sung mahmah ah zong mipilte, i nulehpate leh lawmlegualte hong hilh thuhoihte sansiam theih ding hong hilh hi.

Credit: