Solomon Thu tomkim

Solomon hauhna thusim

Uangtak in Pasian pia

Solomon pen leitungbup ah a haupen, a pilpen dingin Pasian in hauhna leh pilna a piak kumpi a hihi. Solomon in kumpi tokhom a ngahciangin Pasian maiah biakpiakna pia masa hi. Uangtak in Pasian pia hi.

2Khang 1:6 sungah ‘Tuaciangin kikhopna buk ah a om Topa mai a sumngo biaknatau mai ah meihal biakna ganhing tulkhat a pia hi’ ci hi.

Abraham pan David khang dongin Pasian bia uh hi. Ahizongin piakkhat in ganhing tul khat a pia omlo hi. Solomon khit ciangin zong tuabang mi kiciamteh nawnlo hi. Solomon in Pasian biakna ah a hihtheihzah in am hi.

A zan ciangin Pasian in bangdeih na hiam? ci in dong pah hi. Solomon ngetna leh Pasian lungsim ki tuak mahmah lai hi. 2Khang 1:12 sungah ‘…pilna leh theihna nangma tungah kong pia hi. Nang ma a kumpite kua mah in a neih ngeiloh, nang khit a te kua mahin zong tuabang a neihloh ding hauhnate, neihnate leh pahtawina zong nangma tungah kong pia thuah ding hi a ci hi’ ci in kigelh hi.

Pasian tungah uangtak in a piakpen Pasian zongin am tak mah in thukkik hi. Solomon kumpipa tungpan i etteh theih dingkhat ah: Pasian tungah i biakpiaknate, i piakkhiatnate uangtak in piak ding hong hilh hi.

I deihna lian mahmah napi i piakkhiatna a neu mahmah ding kilawm lo ding hi. Uangtak in pia leng Pasian hong thuhkikna zong lian mahmah ding hi.

Pasian deihna tawh ki tuak in thungen

Pasian deihna tawh kituak in thu i nget theih ding kisam mahmah ding hi. Pasian in piaktheih ding hauhna leh pahtawina tampi nei hi. Solomon tungah tuate pia zihziah hi.

Solomon in a nget hi hiaulo hi. Ahizongin a thungetna in Pasian deihna tawh kituak a hihmanin Pasian in a val in pia hi. I thungetna leh i deihnate Pasian lungtang tawh a kituak ding hanciam masak huai hi.

Topa Zeisu in zong ‘Pasian gam leh a ma dikna na zong masa un’ ci in hong hilh hi. Nadang i ngetma in Pasian lungtang tuahkhak masak ding thupi hi. Tua hileh tua nate khempeuh hong ki pia ding hi ci in hong ki hilh zo hi. Pasian hong piaknopte nget masak ding thupi hi.

Pilna thupi ngaihsut

Solomon pen pilna a thupi ngaihsut mahmah mipilpa a hihi. Pilna mah ngen masa hi. Paunak Laisiangtho sungah pilna a manphatna leh a thupinate kiciantak in na gelh hi. Pilna a thupisakna tawh kizui in Pasian in pilna pia a, tua pilna in hauhna leh pahtawina zong hong ngahsak hi ci in gen hi.

Paunak 2:4 ‘Ngun a hihkeileh a kisel sum manpha zon bangin pilna zong in’ ci hi. Pilna khempeuh hong ki patna pen Topa zahtakna hi ci in hong hilh hi. Tua pilna pen manpha mahmah a ‘tua ciangin mipil na suak dinga, na pilna hangin nuam na sa ding hi’ ci in hong hilh hi. Paunak 2:10

Pilna a nei mite mi lungdam mi a hihi cihna hi a, pilna pen ngun leh kham manpha pente sangin zong manpha zaw hi ci in hong hilh hi. Tua pilna pen a mawkmawkna hilo a, minphatna leh pahtawina, khansauna leh nuntakna zong hong pia a hihi ci in hong hilh hi.

Solomon in hauhna leh minthanna a ngah nadingin pilna thupi ngaihsutmahmah ahihlam etteh ding thupi hi.

Credit: