Jacob Thu tomkim

Jacob hauhna thusim

Deihmahmahna lungtang nei

Jacob leuleu pen Issac tawh ki lamdang mahmah hi.  Issac in a pa’ thu mang hi.  Jacob in a huaiham man leh thupha a deihluat manin a pa khem hi.  A tawpna ah Pasian in khang tawngtung a kimang ding minhoih ‘Israel’ pia hi.

Jacob hauhna thusim a khatna ah: thupha a kici limlim deih hi.  Nakdeihlua in a U pa’ khe a lensa in a suak hiliang hi.

A U gilkial tak in gam sungpan hong ciahciangin ‘ka ngakngak hong tung ei.  Thupha ka ngah nadingin bemeh tawh lei ning ei’ ci in ngaihsunpah ding hi.  Innluahza, innluah thupha pen bemeh tawh lei hi.  Hunhoih khahsuahlo cihding a hihi.  A deih thupha  neihsa tawh lei (khek) hi.

A pa mai ah a pai ma in ‘ka pa in hong samsia khaleh’ ci in lau hi.  A nu in hamsiatna teng ke’n hong puaksak ning cilai a hihmanin pai ngam hi.  Laumah taleh a thupha deihna lianzaw hi.

Issac in zong deih mahmahna lungtang a nei Jacob  hamsiat ngam peuhmahlo in thupha na piakbeh zawlai hi.  A dangtak mahmah lungtang kua mah in awlmawhlo in omlo hi. Late 107:9 sungah: Banghanghiamcihleh a mah in a dangtakte phasak a, a gilkialte nahoihtawh vahsak hi’.

Pian 28:1-4 sungah ‘Tua ahihciangin Issac in Jacob sam a, a mah thupha pia in… Pasian in Abraham tunga a piak, tawlkhat sung na omna leitang na neih theih nadingin nang leh na suanlekhakte tungah a mah in Abraham’ thupha hong pia tahen a ci hi’.  Hihpen Issac in Jacob a nihvei thupha a piakna a hihi.  A U aading a hilo, Issac in Jacob a piakkik thupha kammal a hihi.

Upna kamciam

A u Esau ngah ding thupha teng a laksak khit ciangin Esau in thah sawm hi.  Jacob a inn pan taikhia in a pu Laban tenna gam hong zuan hi.  Lampi ah Pasian in a mangsungah hopih hi.

Pian 28:22 sungah ‘… kei ma tungah nong piak khempeuh sawm ah khat nang tungah kong pia ding hi’ ci in Pasian tungah kiciam hi.  Pasian in lawhcinna tawh ciahsak kik taktak a hihmanin Jacob in Pasian tungah a kamciamna bangin hih hi.

Hipen Jacob zat upna kamciam biakpiakna a hihi.  A omnailo sungpan Pasian pia ding ci in Pasian a tona a hihi.  Pasian hong piak tampi pha in, leitungbup a hiphial zongin Jacob in Pasian tungah sawm ah khat piak ding kamciam pia ngam hi.

Tua khempeuh khit nangawn ciangin Jacob in Pasian kiang mahmahpan thupha deih lai hi.  Peniel ah Jacob leh vantungmi khat ki lai hi.  Tua vantungmi in thupha a piakmadong Jacob in a khah kei hi.

A taktak in mihingin Pasian zo ngeilo ding hi.  Jocob in zong Pasian a zo dingin ki um hetlo hi.  Ahizongin Paniel ah Jacob in a ki laipih vantungmi a zo hi.  Jacob in lungsim takpi tawh thupha a deihlam vantungmi in a telcian nadingin a khel thagui mektatsak hi.

Na mahmah ding, si dektak ding hi.  Ahizongin Jacob in ‘ka si phialzongin thupha nong piakkeileh si zawmai ning’ cih lungtang nei hi. Jacob in a lungsim a khiaphetloh ciangin vantungmi in thupha pia hi.

Pian 32:30 sungah ‘…Banghanghiamcihleh maitang kituah in Pasian ka mukhin a, a hizongin kei hong kihing khawi lai hi’ a ci hi.  Jacob in sihlehsih, hin leh hin ci in Pasian kiangpan thupha a ngah madong a lungsim khiamlo hi.

Tuabek hilo in a pulepate mahbangin Jacob in Pasian bia hi.  Biaknatau lam in Pasian a biakna Pian 33:20 sungah ‘Tua lai ah a mah in biaknatau khat bawl a, El-Elohe-Israel, ci in min a phuak hi’ ci in ki gelh hi.

Nasep hanciamna

Jacob hauhna thusim khatleuleu pen nasep hanciam mahmahna a hihi. A nasepna ah citak mahmah hi. Ki lungneusak cihpeuhmah neivetlo hi. Hih lungsimpuakzia pen a pu Laban kiang a, a nasepna pan kimutheipah hi.

A pu Laban tawh a kithukimna bangin a zi ding Rachel thalawh in kum 7 nasem hi. A pu in khem a, Rachel pialo in Leah pia hi. Jacob heh mahmah dinga, a hizongin lungduai hi.

Rachel kum 7 thalawh in nasem leuleu hi. Laban in Jacob pen a thaman tawh kisai khem den hi. Pian: 31:6 ‘Ka tha neih khempeuh tawh na pa’ na ka sepna na thei uh hi. Ahizongin na pa un kei hong khem in ka thaman sawmvei khelkhin a…’ ci in ki gelh hi.

A thaneih khempeuh sitlo in, lungsim takpi tawh na sem hi. 4-5 vei a khemtawh nuakciahlo hi. 10 vei val ki khem cihpen cihtak mahmahna om keileh sem zolo ding hi. Tulai banghileh Laban pen thahlup dingin zong ki deihlo thei ding hi. Hi zah in cihtakna leh nasep hanciamna neileng hauh hun hong tung taktak dinghi ci in i gennuam hi.

A tom in genkik leng: Jacob hauhna thusim pen Pasian thupha lunggulh mahmahna, deihmahmahna lungtang nei hi. A ngah theih ding lampi khempeuh tawn in thupha zong ngaungau hi. Sumbawlna (bemeh zuakna) tawh thupha zong hi. Khemna (a pa khem hi) tawh thupha zong hi. Thatang hatthu (Pasian tawh kilaina) tawh zong Pasian thupha mah zong hi. Vanlenate zonglo in thupha zong hi.

Jacob pen zuaukhempa cihbek in ngaihsut ding hipeuhmahlo hi. Jacob lungsim puak bang nei in lunggulh ngeungeuna tawh Pasian maipha zongleng Pasian in hauhna thupha, nopna thupha leh minhoih hong pia ding hi.

Credit: