Joseph Thu tomkim

Joseph hauhna thusim

Thumanna leh cihtakna lenkip

Joseph in a pulepate bangin Pasian aading biakna tau lam in, Pasian a biakna thu Laisiangtho sungah ki ciamteh lo hi. Joseph pen a pa in tuam it in, thupha pia in puanthak zong pia hi.

Joseph in a pa’ thumang hi. A sanggamte it hi. Joseph lungtang sungah Pasian zahtakna om hi. Thumancihtakna nei hi. A hihna khempeuh ah Pasian mitsuan den hi. Gangawh biakpiakna sangin lungsimtak tawh thuman thutak a deihzaw Pasian in Joseph na pakta hi.

Joseph in thumanthutak deihlua a hihmanin a sanggamte’ siatgamtatnate a pa kiangah gen theizel hi. Tua in a ute hehsak hi. A ute’ muhdah dingsangin thumanna deihzaw hi. ‘Ih pa tungah nong gen laileh hong dawmlo ding’ ci in a u te’n lauthawngsak ngei mahmah ding hi. Ahizongin Joseph in thumanna, diktatna khahsuahlo hi.

A pa in a tuam itna hang, a gamtathoihlote a pa kiangah a genzelna hang leh a mangmatte hangin a sanggamte in muhdah uh hi. Thahlup dingzah in mudah uh hi.

Ahizongin tua thuman gamtatna Pasian in etlawm na sa mahmah hi. ‘...a lungsim thutang mite’ suanlekhakte thupha kipia ding hi. Hauhna le nopsaknate a innkuan sungah dim dinga, a ma thumanna kip tawntung ding hi’. Late 112:2-4

Egypt gamah sila in kizuak hi. A topa’ innsungah a sepna khempeuh ah cihtakna nei a, Pasian in thupha pia hi. A tonu’ zolna nial hi. Sih ding, thongkiat dingte sangin Pasian mai ah thumanna leh cihtakna lenkipzaw hi.

Joseph in ‘bang ci in hih gitlohna lianpi bawl in Pasian tungah khial ding ka hi hiam?’ ci hi. Pian 39:9. Joseph in a gamtatna khempeuh Pasian maiah a gamta zah in ki ngaihsun hi.

Joseph Lawhcinna thusim part 2+3

Ngaklah selo

Joseph in Pasian laptoh ding thatanghatthu tawh ngatbawlselo hi. Lungduai tak in ngak hi. Kumpi suahding Pasian in mang a matsak leh kumpi a suahkikal kum tampi sawt hi.

Kumpipa mang a khiatna gensak hi. Tuaciangin ‘tu in Faro in thungaihsun siam mipil khat tengkhia inla Egypt gamsung a uk dingin a mah koih in’. Pian 41:33 Hihpen Joseph in Faro tungah a gen a hihi. ‘Kei hong koih inla Pasian in hong lahsa bangin kei hong vaihawmsak in’ ci selo hi.

Pasian laptoh ding ahun ngaklahlo in cihtakna leh thuakzawhna tawh ngak tentan hi. Kumpi Saul in tawmcik sungbekbek lungduai tak in Samuel a ngaklohna hangin kumpi tokhom tanlawh hi. 1Sam13:8-12 sungah ki muthei hi.

Pasian a ziakai ding, a uphuainawnlo ding tawh kibang hi. Joseph aadingin in lametbei huai kha ding hi. A hizongin a mah in ngakzo hi. Saul in mite a ma kiangpan a paikhiat ciangin mite en in biakpiakna bawl a Pasian in nolhpah hi.

David in sathau a kinilhzawh kumsawtpi galtai hi. Saul thahlup theihnading hunhoih tampi ngah mahtaleh Pasian zia tawh a kituaklo in ki lamto nuamlo hi. Pasian zia ngak hithiat a hihmanin Pasian in lamto hi.  

Tuamahbangin lungduaina, cihtakna leh thuakzawhna tawh Pasian hun ngaksiam ahihmanin Joseph in kam a genzawhloh ding minphatna leh hauhnate ngah hi.

Mawhmaisakna nei

Joseph lungtang sungah itna leh maisakna a dimin om hi. A sanggamte tungah mawhsaknuam hileh a thuhkik theihna ding hunhoih neilua hi. Ahizongin Joseph in ‘…banghanghiamcihleh nuntakna a hu dingin note mai ah Pasian in kei hong sawl hi’ ci hi. Pian 45:5.

Note in kei nong bawlsia uh a, nong zuak uh hi cilo hi. Hihbang lungtangpen mikim in i neihzawh ding thupi mahmah ding hi. A ma tunga piangkhempeuh zong Pasian kiangpan hi ci in ngaihsun hi. Joseph nuntakna pan a hauhna thusimte i etteh theih ding thupi hi.

Credit: