Jewish Tangthu tomkim

Jew mite Hauhna thusim laibu pan

Na khatpeuh na hihma in Pasian tungah piakna tawh biakna nei masa den in. Pasian maipha zong masa in. Pasian kammal tungah muanlahna neilo in upna nei in. Zinleleng peuhmah itna tawh zindo siam in.

Nulehpa zahtakna sungah hauhna zong om hi cih phawk den in. Na hauhnopleh hauhna khaici na tuh ding mangngilh kei in. Pasian kianga a ki tuh khaici a polo omlo ding hi. Deih mahmahna lungtang tawh Pasian maipha leh thupha zong in.  

Pasian tungah kamciam bawl inla na kamciamna bangin hihtakpi in. Na nasep ciangin lungsim takpi tawh lawptak in sem in. Ki lungneu sak pah ngeikei in.

Na hihna khempeuh Pasian mai ah a hihbangin ki ngaihsun in. Pasian’ hun lungduaina, cihtakna leh thuakzawhna tawh ngaksiam in. Mi mawhnate siangtak in maisak in. Itna lak in. Nanglenang ki laptohsawm kei inla Pasian zia ngak in.

Pasian hong sawlbangin sem in. Na mipihte itna lungtang tawh ki pan in. Mipilte hong thuhilhna ngaisiam in.

Pasian tungah lungdamko in a mah phat den in. Pasian nasemte, Pasian mintawh hong paite zahpih in kampau ngeikei in.

Mi deidan kei in. Mikhempeuh Pasian hangin zahtak in. A baihsa nate bek lamen kei inla nang ma thatang, nang ma sum bei in thaman piak sawm in.

Pasian tungah uangtak in piakhia lel in. Pasian deihna banghiamcih theihsawm inla Pasian deihna tawh kituak in thungen in.

Pilna a thupina leh a manphatna tawh kituak in zong in. Sin in. Thupi ngaihsut ngiat in. Tua in hauhna hong piathei hi.

Na ngahding kilawm thaman hong ki piakpahloh sim in phun kei in. Ngaklah bawl kei in. Midangte muan dingsangin Pasian muan ding hoihzaw hi. Pasian deihloh a hihnakleh sem kei in.

Pasian hangin na pumpi ki siangtho sak in. Na nasepna peuhah paubanna a omlo dingin sem sitset in. Nisim in thungen in. Pasian ompihna mahtawh na lawhcing ding hi.

Mizawng micimawhte huh in. Panpih in. A maute simmawh kha kei inla a neihsa guksak kei in. Mihoihlo te tawh ki khawlkei in. Haksatna na tuak zongin Pasian mawhsak ngei kei in.

Pasian tungah lungkim den in. Nakhempeuh a ma aa hi a, a ut bangbang in septheihna ding thu nei hi. Nakhempeuh ei aadingin a hoihpen gelna a neiden Pasian a hihna phawk tawntung in.

Hihteng pen Laisiangtho sunga om Jew mi hau mahmahte, kumpite, mipil minthangte tungpan i etteh theih ding hauhna leh minliatna thusimte a hihi.

A mikim te’ gamtatzia i etteh zo kei zongin mi khat gamtatna peuhmah khahlo in nungzuih ding i ki hanthawn nuam hi. Hi bang a gamta mi tungah hauhna hong tung taktak ding hi ci in i lamen hi.

Credit: